Mizorama Oil Depot bun anih theih nana hmalakna sawipui

22 Oct 2026: Assam khawpui Guwahati a cham mek Food, Civil Supplies and Consumer Affairs Minister Pu B.Lalchhazova chuan vawiin khan Mizoram House-ah HPCL hotute kawmin Mizorama Oil Depot bun a nih theih nana hmalakna te a sawipui.

Pu B. Lalchhanzova chuan HPCL-in Mizoramah Oil Depot an neih ngei theih nan tha thlah lo in kan um zel a, kan hmalakna ten rahtha a chhuah ngei theih nan kan theihna zawng zawngin kan bei zel dawn a, HPCL bakah IOCL lam te nena Oil Depot siam tura indawrna a la kal ve zel a, Chief Minister remtihna angin Oil Depot siamna tur hmunhma pawh Oil Company te hnenah man awm lo a pek mai theih beisei a ni, a ti.

Supply Minister chuan Mizoram chu tlang leh suarin a bawm vel ram tlawhpawh awlailo a nih avangin India ram state dangte hmasawn rualin hma kan sawn chak lo bik hle a, Oil company te pawhin hlawk tumna atang ringawta thil thlir loin, Mizoram mamawh tihsak chu an company tan pawh van malsawmna dawn belhna tur a ni ngei dawn a ni, a ti a. Mizoram chhim lama sumdawnna kawng inhawng mek en chungin chhim lamah pawh Oil Depot hi hawn belh zel dan thlithlai turin HPCL te hi a chah a, India ram himna tur en tel chunga a rang thei ang bera Mizoramin Oil Depot a neih chu ram hmangaihna avang pawhin tihmakmawh a ni, a ti.

Meeting-ah hian HPCL aiawhin General Manager (Operations) Pu Gurubachan Singha, Rahul Kumar Singh CRM leh Ratul Bora DGM te an tel a ni.

Meeting zawh hian Pu B.Lalchhanzova chuan Betkuchi hmuna HPCL Oil depot chu a tlawh bawk a. HPCL nen an indawrnaah hian Minister hi Dr Saithangpuia, DRC Mizoram House in a tawiawm a ni.

B. Lalchhanzova chuan Mizoram hmar lamah 5 acre vela zau ram an lo zawng ang a, kumin chhung ngeiin en hoa, tih fel a duh thu HPCL hotute hi a hrilh bawk.