14 Aug 2025: Environment Forest and Climate Change hnuaia Wildlife Division chhinchhiah danin, Mizorama dan lova ramsa leh sava tawlhruk man zat chu 1103 a tling tawh.
Wildlife Division hotuten Akashvani Aizawl an hrilh danin, heng ramsa tawlhrukte hi Assam Rifles, Border Security Force, Directorate of Revenue Intelligence-te bakah Custom Department leh Mizoram Police-te leh Central YMA Anti Drug Squad ten an man a ni a, a tlangpuiin Burma lam atanga lo kal a ni.
Wildlife Division-te chhinchhiah danin dan lova nungcha tawlhruk zingah hian laiking a tam ber a, laiking chi hrang hrang 500 chuang man a ni a, heng bakah hian sava chi hrang hrang, satel leh rul chi tam tak bakah awle thlenga dan lova tawlhruk a nih thin thu an sawi bawk. Wildlife Division hotute chuan, heng nungcha dan lova tawh ru thin te hian an nungcha tawlhruk thin te chu bawm tawt tak takah te leh boruak luh theih mang lohna-ah te riltam tak leh dang char taka an dah thin thu sawiin thuneitu lamin an hnena an rawn dah nungcha tam tak chu chhan hman lova an thih thin thu an sawi bawk.
Wildlife hotute sawi danin tunlai hian mihringte chenna in leh a chheh velah rul a inlar nasa hle a, rul seng hawi hna hi nitin deuh thaw rul lam tui mi inzawm khawm ‘zo herbs’ te nen an thawk thin a ni. (AIR Aizawl)
