01 Dec 2024: Mizoramah HIV/AIDS vangin kum 1990 atanga kumin August thla thleng khan mi 5,277 an thi tawh.
Mizoram State AIDS Control Society (MSACS) chhinchhiah danin, kum 1990 October atanga kumin August thleng khan Mizoramah HIV vei 31,461 hmuhchhuah an awm tawh a. HIV avanga thi zat hi mi 5,277 ni a chhinchhiah a ni. HIV kai tam ber 91.23% te chu kum 15 atanga kum 49 inkar mi an ni a. HIV hrik kaina tam ber chu mipat hmeichhiatna atangin a ni a, mipat-hmeichhiat hman atanga kai hi 63.93% an ni. Ruihhlo a inchiu atanga kai 30.80% leh nu leh pa atanga naute-a kaichhawn 2.71% an awm a, a chhan sawi fak tur hirat loh 1.47% an awm bawk. HIV/AIDS damdawi Antiretroviral Therapy (ART) la mek mi 16,661an awm mek bawk a ni.
Hei bakah hian National AIDS Control Organisation (NACO) in India rama HIV AIDS dinhmun a tarlanna, kum 2023-a HIV Estimate leh HIV Sentinial Surveillance a tihchhuahah Mizoram chu India rama HIV hluarna ber a ni chhunzawm a, ram mipui atanga chhutin HIV kai zat hi 2.73% a ni a. Hetih lai hian kum 2023-2024 chhungin Mizorama HIV kai thar zat a tlahniam hret a, HIV hluarna ber state erawh a la ni chhunzawm zel a ni. Khawvel ram changkang zawkah kumtin HIV kai thar zawi zawiin an tlem zel a, ram thang lai leh rethei zawkah he natna hi a darh chaka, buaipui a hlawh a ni. India ram hi mipui cheng tam ram bik ram tehnaah South Africa leh Nigeria te hnuaiah 3-na a ni mek a ni.
Vawiin hi ‘World AIDS Day’ a ni a, he ni hi HIV/AIDS chungchang zirhona leh a veite chhawmdawl a, tanpuina hun atan hman thin a ni. Presbyterian Church of India, Mizoram Synod hnuaia tualchhung kohhran hrang hrangah he ni pual a thuchah, mipuite hriat tur pawimawh leh zirtirna te chhiarchhuah a ni . He ni hman dan tur a ruahman hrang hrang te tarlan a nih bakah Mizoramah HIV/AIDS a zia-awm zel theih nan leh kai thar an awm belh loh nana inven dan pawimawhte leh hmalakna tur hrang hrangte kohhran mipui hriatah an tarlang bawk. (AIR)
