Mizoramah kumin 2024 January leh March thla inkar chhungin TB vei mi 595 hmuhchhuah an ni tawh
30 April 2024: Vawiin khan Directorate of Health Services Conference Hall, Aizawl-ah National TB Elimination Programme 1st Quarter 2024 Review Meeting neih a ni a. He hun hi State TB Officer Dr Febiola Kharkongor-in a kaihruai a ni.
Report-a a lan danin kumin 2024 January leh March thla inkar chhungin TB rinhlelh mi 3,761 test an ni a. TB vei mi 595 hmuhchhuah tawh an ni. Nikum 2023 January leh March thla inkar khan TB vei mi 420 hmuhchhuah an ni thung.
Kumin January leh March thla chhunga district hrang hranga TB hmuhchhuah dan chu hetiang hi a ni: Aizawl- 433, Kolasib- 46, Lunglei- 34, Lawngtlai- 27, Champhai- 24, Siaha- 16, Serchhip- 10, Mamit- 5.
Kumin 2024 1st Quarter chhungin MDR-TB vei mi 38 hmuhchhuah an ni a. TB leh HIV vei kawp mi 57 hmuhchhuah an ni bawk. TB vanga thi hi 5% an ni a. TB tihdam zat hi 77% a ni. TB vei hmuhchhuah zingah hian 6% te chu zunthlum nei an ni a. 33% chu vaihlo kaihhnawih ti niin, 16% chu Zu in mi an ni bawk.
Vawiin programme-ah hian TB laka inven dan TB Preventive Therapy chungchanga hriattur pawimawh sawi a ni a. An khãka hrik hmuh Chuap TB vei chenpuite chu TB an vei leh vei loh endik vek-a TB an vei loh chuan TB venna hi an lak a ngaih thu te, Chuap TB khãka hrik hmuh te chuan an chenpuite TB an kaidarh mai a awlsam em avangin an chenpuite hian TB venna an lak a pawimawh thu sawiho a ni. Hei bakah hian TB venna hi la duh lo an awm nual thu tarlan a ni a. La tura intihluih theih ni lo mahse hei hian TB kai lo tura a ven avangin Chuap TB vei chenpuite chuan an lak ngei a pawimawh thu tarlan a ni bawk.
