04 Jan 2024: Vawiin hi khawvel pumhuap a Mitdel Hawrawp hman tan ni [World Braille Day] a ni a. He ni pual hian Mizoram Blind Society [M.B.S.] chuan Mizorama mitdel zawng zawngte, an mahni enkawltute, Mizoram Sawrkar hotute leh Zoram mipuite duhsakna chibai an buk a ni.
Khawvel ram hrang hrangah Braille hmangin mitdelten lekhate zirin hlawhtling tam tak an awm tawh a. Mizorama mitdel school hmasa ber chu April ni 15, 1977 khan Salvation Army-in Kolasib-ah an din a. Tun thlengin mitdelte tana zirna in tha tak leh belhfakawm tak niin he school atanga lehkha zir hlawhtlinga sawrkar hna thawk tawhte pawh engemawzat an awm tawh a ni.
Kum 2000 hnu lam khan Mizoram hmun dangahte pawh Blind school dangte pawh din a lo ni ta zel a. Tunah hian Mizoramah Mitdelte tana zirna school tha tak pahnih The Salvation Army Integrated English Medium School For The Blind Kolasib ah leh Special Blind School Durtlangah te a awm a. Heng blind school-ah te hian mitdelte tan Elementary atanga Higher studies thlengin a thlawn vekin Hostel Facilities nen pek a ni.
Tunah hian Mizoramah Braille hmanga lehkha zir mitdel mi 20-in B.A. an pass tawh a. Mi 10 M.A. zo tawhin pahnihin M.Phil an zo tawh. Mi pahnihin M.ED. an zo tawh a, mi 8-in B.ED an zo tawh a. Tunah hian B.A., B.ED leh M.A. zirlaite an awm mek bawk. Tunah hian mitdel zirna lama hlawhtling tawh, mi 20 velin sawrkar hna thawk tawhin chhungkua an chawm mek a ni. Social Welfare, Tribal Affairs, Woman And Child Development hmalakna zarah Mizoramah pawh mitdel hawrawp chhutna a awm tawh a. Hengte hian Mizorama mitdel zirlaite tan hmasawnna tam tak a pe tawh a ni. Chubakah, tunah chuan Braille chauh ni tawh lovin Screen Reading Software hmangin mitdelte tan pawh computer a operate theih a. Smart phone te pawh Talking Software hmangin mitdelten an mahniin an operate thei vek tawh a ni. (AIR)
