23 Sept 2025: Vawiin khan Labour, Employment, Skill Development & Entrepreneurship Department leh International Labour Organization (ILO) tangkawp ten an buatsaih, Mizote tana eizawnna leh thiamna lama hmasawnna tur chungchang sawi hona, “Rountable on Employment, Skills & Social Protection” chu ATI Auditorium, MINECO, Aizawl-ah neih a ni a, LESDE Minister Pu Lalnghinglova Hmar chuan he hun hi hmanpuiin Dr. Lalhriatzuali Ralte, LESDE Secretary chuan kalkhawmte lawmna thu a sawi a, Pi Lalramdini, Under Secretary, Mizoram Youth Commission chuan inkhawm hi a kaihruai a ni.
Minister Pu Lalnghinglova Hmar chuan thu sawiin, khawvela pawl pawimawh berte zinga mi, lehkhabu leh zirlaibuahte chauha kan lo hmuh thin, International Labour Organization-te nena Mizoram hmasawnna ngaihtuaha, thawk ho thei tur leh thu sawi ho theihna hun lo thleng chu lawmawm a tih thu a sawi a. ILO te nena thawhhona hian rah duhawm tak a chhuah zel a beisei thu a sawiin; he hun chhima kal thalaite leh zirlaite pawh an ngaihtuahna leh rilru zawng zawng senga hlawk taka hun hmang theuh turin a chah a ni.
Satoshi Sasaki, Deputy Director, International Labour Organization pawhin thu sawiin ILO hnathawh tlangpuite a tarlang a; thiamna, hmasawnna leh eizawnna kawngahte Mizo thalai ten theihna nasa tak an neih ngei a rin thu sawiin ILO chu Mizorama mi rethei leh mi te berte thlengphak hmasawnna thlen tura, an thiamna leh theihnate hlanchhawng tura a inhawn reng tur thu a sawi bawk a ni.
Vawiin hun hmannaah hian College zirlai te, entrepreneurs-te bakah sawrkar mi pawimawh mi thahnem tak an tel a ni. (DIPR)
