30 Jan 2024: Vawiin khan MJA Dist Hqrs Lunglei chuan Lunglei Press Club ah Annual Conference an hmanga Health Minister Pi Lalrinpuiin khuallian niin a hmanpui.

Hunserh hmangtu PP Laldinmawia Hnamte chuan Kolosa 4:6 hmangin Journalist-te tawngkam chhuak uluk leh fimkhur a ngaihzia sawiin, mipuite tana rawng an bawlna chu Pathian rawngbawlna a ni a ti a, mipuite hriat leh chhiar atana tihchhuah tur chin thliar fimkhur a tul thu te a sawi a ni.

MJA Lunglei Annual Conference  Pu Thanghmingliana Renthlei Vice President kaihhruaiah hian khuallian Health Minister Pi Lalrinpuii chuan, mipuiten a hun takah thu dik tak an hriat a tul thin a chutianga mipuiten thudik an hriat theihna tura pawimawh ber chu Journalist-te an ni tiin Sawrkar langtlang leh sawrkar tha a awm theihna tura sawrkar khalh ngil turin Chanchinbumite chu mipawimawh ber an ni, a ti.

Pi Rinpuii chuan kan sawrkarin ni 100 chhunga kan hnathawh tur a hlawhtlin ngei theih nan keimah ngei pawhin ka department chan Social Welfare Department ah nasa takin hma ka la tawh a ni tiin kan ramah ruihhlo a hluar em em a, hemi dona kawngah Chanchinbumi te chu theihtawpa sawrkar thawhpui tur leh mipuite hnena zirtirna nasa zawk pe turin a sawm a ni. Health Minister Pi Rinpuii chuan eng Party pawhin sawrkarna siam sela Pathian remruata pawm thiam tur leh sawrkar thawhpui thiam turin Chanchinbumi te chu sawmin thudik tan a vul zel turin duhsakna a hlan bawk a ni.

Pi Rinpuii chuan, Health Care hi level 3 angin a sawi theih a, chungte chu – Primary Health Care – Doctor/Nurse etc a inentirna, Secondary Health Care – Specialist hnena inentirna, Tertiary Health Care – Specialist leh tunlai Khawl changkang nena inenkawlna te an ni, a ti a. Kan Mizo Doctor thiam tak tak ten Mizoram damdawiin ngeia Kal (Kidney) thlak ve an inhuam thu han hriat te, Cancer zai thei tura khawl leh hmanrua an neih that ve tawh zia han hmuh te leh Cancer zai tur Surgean tha kan neih ve tawh dan te, Lung zai lama hmalak theih an chak ve tawh thu te leh heng hmalakna hian Sawrkar leh mimal sum tam tak a save theih dan tur han chhut hian, Tertiary Health Care lama hmalak nasat hi a chakawm zual hle a ni, a ti.

Khuallian Health Minister chuan, Specialist Doctor leh Super-specialist thiam tak tak kan neihte pawh hi an thiamna kan hman tangkai theih dan ber tur chu tunlai khawl changkang awmna (Facility awmna) a dah a ni a. Zaimi (Surgeon) ni reng si, mi zai theih miah lohna hmuha dah te, khawl awm miah lohna hmuna dahte hi Wastage of man power dik tak a ni dawn a ni, a ti.

Pi Rinpuii chuan, Mizoram hi tlangram a ni a, a mawina pangngai “natural beauty” hlut tu kan thahnem chhoh zel rualin tourist tam zawk hip tur leh tourism atanga sum lalut

belh tur chuan hmalak nasat kan la ngai em em a. Tun tum ka lo haw pawh hian Lunglei leh a chhehvel khua ten Tourism lama hma kan sawn theihna tur Plan tha tak mai kan neih theih nan Tourism lama kan hotu – Addl Secretary Pu V. Lalengmawia chu min tawiawm turin ka ngen a. Ani hian Theiriat tlang te, Serkawn, Sairep etc te a hmunah a fang anga, Plan te pawh a tul angin kan siam tlang thei dawn a ni. Eng anga Plan tha pawh mipui thlawpna tello chuan a hlawhtling thei dawn lo va, chuvangin chanchinbumite pawh mipuite hnena a tul anga awareness min pek pui a, min tanpui zel turin ka sawm duh bawk che u a

ni, a ti.

He hunah hian MJA Lunglei  President Pu Laltlanthanga pawhin thu sawiin, Social Media thang chak tak karah mi tam takin Chanchinbu leh TV kaltlanga thuthar thehdarh chu an la ngaisang zawkin an la ngaihlu zawk a ni tiin Chanchinbumi te pawh theihtawp chhuah zel a tul thu leh thu dik leh belhchian dawl puanzar kawngah fimkhur leh zual a tul thu a sawi.

MJA Dist Hqrs Lungleiah hian tun dinhmunah member 20 awm mekin vawiina an Conference-ah hian General Secretary leh Treasurer report ngaihthlak a ni bawk.