MJA Dist Hqrs Lungleiin Mizoram State University chungchangah resolution an pass

30 Jan 2026: Vawiinah MJA District Hqrs Lunglei chuan Annual Conference leh hruaitu thar thlanna hun an hmang.

Annual Conference hi chawhma dar 11:00 khan Lunglei Press Club-ah hmangin; inkhawm hi Pu H.Lalthansanga President-in a kaihruai a ni.

Chawhma inkhawm hi inhlantharna hun atan hmangin; Upa Tlantununga Chawngthu, Lecturer BHSS chuan Sam 90:12 behchhanin Pathian thuchah a sawi a. MJA-te hi Lunglei mipuite beiseina in ni tih hre rengin Pathian hnena inhlantharin, Pathian rinna nen ruihhlo leh duhamna nena damchhung ni chhiar lovin, mipuiten in laka beiseina sang tak an neih hlen chhuak turin; Pathian malsawm tlaka damchhung ni chhiar turin inbuatsaih thar ang che u, a ti.

Chawhnu lamah Vice President Pu Lianchama Chhangte kaihhruaiin Conference hun hman chhunzawm a ni. Report hrang hrang ngaihthlak anih bakah zawhna leh chhanna hun hman a ni a, Conference hun hman zawhah Pu R.Lalnunthara Former MJA Lunglei Adviser kaihhruainain kum 2026 – 2028 atana hruaitu thar thlanna hun hman a ni. Hruaitu atana thlan tharte chu:-

President – Pu H.Lalthansanga, Editor Lunglei Times
Vice President – Pu F.Lalngaihzuala, Correspondent LPS
Treasurer – Pu K.Lalrinpuia, Editor Vulmawi.

Executive thlan thar 5 te:-
1.Pu Chawngchhuana Chongthu, Editor Zonet JB
2.Pu Lalhmachhuana Ralte, Editor Lawhleng
3.Pu Lalrintluanga Khiangte, Editor Daifim
4.Pu Rodingliana Khiangte, Changdam
5.Pu Thanghmingliana Renthlei, Editor Zunzam.

Mizoram State University chungchangah Resolution siamin an pass bawk:-
“Mizoram State University Lungleia awm tura Chief Minister Pu Lalduhoma’n November ni 20.2025 a HPC Office Lungleia Press Conference naa a puang kha Mizoram Journalists Association Lunglei chuan lawmawm kan ti a, C.M leh a kaihhruai sorkar chungah lawm thu kan sawi a ni.
Hetih rual hian Mizoram State Assembly-ah he Bill hi Aizawlah awm tura pass lo ni tawh mahse, Lungleiah awm tura C.M-in a puan ang ngeiin, Mizoram State Legislative Assembly Budget Session-ah Bill lo pass tawh siam tha (Amend) a, Lungleiah ngei awm tura House a pawm leh turin kan ngen a ni.”