10 May 2024: MJA Lunglei member-te chuan an President Pu Laltlanthanga hovin vawiin khan Power Grid Centre, Lungsena hnathawh kal mek an tlawh a, Pu Hrangchhuana Sailo General Manager leh a thawhpuiten an lo dawngsawng.
Kum 2018 atanga thawh tan Rs Vbc 411.19 senga Power Grid Corporation of India hnuaia thawh mek Power Grid Centre Lungsen a mi hi thawktute chuan harsatna dangin a tlakbuak loh chuan kumin chhung ngeia Commission theih an beisei thu MJA member Lungleite hi lo hrilhin tun dinhmunah hnathawh tur 80% thawh zawh tawh a ni an ti.
Lungsena Power Grid Centre hi ataka hman theih anih hunah chuan Khawiva Lunglei atanga 132KV Power Line dawngin helai hmun atang hian Lungsen leh a chhehvel khaw hrang hrang bakah Chawngte lam thlengin semchhuahna hmun pawimawh a ni dawn tih thawktute chuan sawiin, hei mai bakah hian Internet hmanga eizawnna hmangtute leh Service Provider-te’n nasa takin an chhawr tangkai theih turin internet Line ruahman ni bawkin internet hmangtuten nasa takin an hmang tangkai dawn tih an sawi bawk.
Vawiina helai hmun MJA Lunglei member-te’n an tlawh hian hnathawktute nen an hnathawh dan kawng hrang hrangte sawihoin harsatna an neihte leh hnathawh zawh anih huna Lungsen leh a chhehvel mipuite’n an chhawr tangkai dan tur chipchiara hrilhhriatna hun an hmang a ni.
