MLA Pu Lalramliana Papuia’n Pu Buanga Award; a dawngtu Pu C.Chhuanvawra kutah a hlan
17 Oct 2025: Vawiin chhun khan Mizo Academy of Letters (MAL), Joint Headquarters, Lungleiin Mizo thu leh hlaa thawh hlawkte hnena kum 3 dana an hlan thin, “Pu Buanga Award” chu nimin khan Pu C.Chhuanvawra hnenah an hlan a. Hlanna inkhawm hi Lungleia Art & Culture Auditorium-ah buatsaih niin, Lunglei South bialtu MLA Pu Lalramliana Papuia chuan Pu Buanga Award hi a dawngtu Pu C.Chhuanvawra kutah a hlan.
He huna khuallian Pu Lalramliana Papuia chuan MAL chu mahni dinchhan ang taka Mizo hnam tana hma latu pawl ropui tak a ni tiin, mahni huang chin ramri pela kal ngai lo pawl zahawm tak, hnam tana thil hlu leh thil tak tak buaipui thin nia a hriat thu a sawi.
Pu Lalramliana Papuia chuan hnam thu leh hla (literature) awm sa humhalh leh tihhmasawn kawnga hma lak that chu hnam a ral loh nana thil tul leh tan lakna tur pawimawh tak a nih thu a sawi a. Chumi kawnga mi hlu leh chawimawi tlak ngei MAL te’n an chawimawi chu lawmawm a tih thu sawiin, Pu C.Chhuanvawra chu a lawmpui thu leh chhuanawm a tih thu a sawi a. Lehkhabu hlui leh lehkhabu thate vawn him mai hi Mizo literature vawn him nan a tawk tawh lo va, tunlai thiamna mila literature vawn him leh tihhmasawn kawnga hma lak thiam zel a tul ta hle a ni, a ti.
Award dawngtu Pu C.Chhuanvawra chuan Zosap hmasa ber pakhat, Mizo hawrawp siamtu leh thu leh hla tha tak tak hnutchhiahtu, Chanchin tha baka tha dang tam tak Mizote petu Pu Buanga hming chawi chawimawina a dawng chu hlu a tih thu sawiin, Award hlantute leh amah lawmpuitute chungah lawm thu a sawi a. Pu Buanga’n “o, au, eu, iu” ri hnua vowel lam leh dawna “v” lo ri tel thin chu ziah tel a duh leh a tingaihnobeitua mi thiam thenkhatin an sawi chu ropui a tih thu sawiin, amah Pu C.Chhuanvawra chuan chuti anga “v” hman tel chu hun rei tak a chin loh hnuah tunah chuan “v” hman duh zingah a tel leh tak thu a sawi a. Chhim leh hmara “g” leh “ng” lam rik dan inang lo erawh chu pawi a tih thu sawiin, a dam chhung ngeiin lam rik dan thuhmuna lam ri turin inremna awm se a duh thu a sawi.
Pu Buanga Award hlanna inkhawm hi MAL Jt Hqrs Lunglei President Pu C.Hrangdula’n a kaihruai a. MAL Jt Hqrs Lunglei Adviser Rev. RC Lalthanzama’n hunserh hmangin, Pu Buanga Award Committee Secretary Pu Rochharzela’n report a pe a. MAL Jt Hqrs Lunglei Secretary Pu TC Jonunsanga’n Pu Buanga Awardee Pu C. Chhuanvawra chanchin tlangpui sawiin, Ngaihi Chhakchhuak (ECM, MAL Jt Hqrs Lunglei), Ramhlimpuia (5th Semester, BA Mizo, Lunglei Government College) leh K.Krawsthanga (Adviser, MAL Jt Hqrs Lunglei) te’n hla an chham a. MAL Jt Hqrs Lungleia Executive Committee Member Pu ZH Ropuia’n lawm thu sawiin hun a khar.
Pu Buanga Award hi kum 2000 a\ang khan Mizo thu leh hla lama thawh hlawkte chawimawina atan hlan thin a ni a. Kumina hlan Pu C.Chhuanvawra hi Pu Buanga Award dawngtu pasarihna a ni a. Tangkapui (trophy), thuchei (certificate) leh pawisa fai Rs 10,000/- hlan niin, pawisa fai hlan tur hi khuallian, Lunglei South MLA Pu Lalramliana Papuia’n a tum a ni.
Pu C.Chhuanvawra hi kum 16 mi chauh a nih laiin kum 1975 khan a thuziak hmasa ber, “Ka Hriat Ve Dan” tih chu a ziak a. Hla 72 phuahin, article 542 leh seminar paper 37 a ziak a. Kum 2023 thleng khan a lehkhabu ziah bu 17 chhuah a ni tawh a. Primary School atanga University thlengin a kutchhuak hrang hrang 26 zet zirlaibuah seng luh a ni a. India ram civil chawimawina sang Padma Shri chu Literature huangah kum 2014 khan dawngin, National Award to Teachers (2002) bakah, Mizo Writers’ Association leh Art & Culture Department buatsaih “Thu leh Hla Thiam Chawimawina” (2009) leh Vulmawi Lifetime Achievement Award (2012) te a dawng tawh bawk.
