MNF leh BJP-ten campaign bul an tan tawh; ZPM Party leh INC-te pawhin campaign an tan hnai
26 March 2024: Rorel lai Zoram People’s Movement (ZPM) party chuan thla thar April ni 1 atangin Lok Sabha inthlan lo awm tur atana campaign beihpui an thlak dawn.
ZPM chuan nimin khan thuchhuah siamin Campaign Kickoff hi Aizawl Vanapa Hall ah hman a ni dawn a, party hruaitute sawi danin Chief Minister Pu Lalduhoma chuan he hunah hian thu a sawi anga, amah bakah hian Party hruaitu dangte leh President Pu Lalliansawta te he hunah hian an tel bawk ang.
Indian National Congress pawhin March ni 28 atangin Campaign beihpui an thlak tan dawn a, hetihlai hian state-a eptu party lian ber Mizo National Front (MNF) leh BJP hruaitute chuan campaign bul an tan tawh tih an sawi a ni.
April ni 19-a Mizoram Lok Sabha bial inthlan vote thlak turah candidate 6-in an chuh dawn tih a chiang tawh a, mi 5 hi political party-in an dintir an ni a, 1 chu independent a ni.
Hun hmasa thlirin Mizorama Lok Sabha inthlanah hian Congress party chu vawi 6 a chak tawh a, MNF vawi 2 chak tawhin kum 2017-a din ZPM chuan a vawi khatna atan party malin Lok Sabha-ah an ding dawn a, ZPM hi kum 2019 khan Congress nen common candidate anlo nei tawh a ni.
Kum 2019 Lok Sabha inthlanah khan MNF party chuan vote awm zawng zawng atangin 44.89% a hmu a, ZPM leh Congress tangdunin dawtin 43.26% an hmu a, BJP in 5.75 % hmuin People’s Representation for Identity and Status of Mizoram (PRISM) chuan 2.67 % an hmu a, 2.94 % chu independent candidate pahnih ten an hmu bawk a ni. (AIR)
