15 Dec 2023: MNF President Pu Zoramthanga chuan, tun inthlanpui neih zawh taka MNF Sawrkar tla chu Pathian remruatna a ni, a ti.
Pu Zoramthanga chuan, MNF chu Pathianin chak takin a siam ngai lova, dinhmun sângah a dah pawhin a hnûk thla leh thin a, hei hi an chapo loh nan a ni, a ti.
MNF Party hian Aizawla an party office Mizo Hnam Rûn-ah “Exodus Day leh Hnam Rûn Kharna” hun an hmang a. Inkhawmnaah hian martar-te sunna hun hman a ni a. Inthlanpui tluang taka zawhfel a nih avanga lawmthu sawina te, sual thupha chawina te, leh kum 2024 dam taka chuangkai tur leh MNF Party tluang taka a kal zel theih nana tawngtai rualna hun hman a ni bawk.
He huna thu sawitu Pu Zoramthanga chuan, kum 1971-a Dhaka (East Pakistan) atanga hnam pasaltha te chhanchhuahna nî ropui chu Exodus Day tih a ni, a ti a; khami nî khan Pathianin an tawngtaina chhang lo se, Pu Denga leh a hote kha hmelma kutah an thi vek ang a, hnam movement pawh a tawp daih ang, a ti.
Minister hlui Dr R.Lalthangliana pawhin he hunah hian thu sawiin, hnam martar leh an chhungte bakah sawrkar thar leh mipui kalkhawm te chibai a bûk a. Khawvela hripui lêng leh hun khirh hmachhawn tura Pathian-in MNF a dah chu lawmawm a tih thu a sawi bawk.
Hnam Rûn hawn hun atan kum January 15, 2024 puan a ni. (AIR Aizawl)
