Mo thian tura Lungleia kal Auto Rickshaw chetsual avanga thi postmortem hnuah Aizawl panpui
Sept ni 8, Zirtawpni tlai lam dar 4:00 bawr vel khan Lunglei Farm Vengah Auto Rickshaw MZ-02B/ 4871 chu a chesual a, he chetsualna avang hian H.Lalchhanchhuahi (27) New Capital Complex Aizawl chu a boral.
Thu dawnnain a sawi danin Auto Rickshaw hi Ramthar Veng lam pana tlan niin Farm Veng Pu Bawka Point kawngkual deuh an thlenin an mahni tawk zawnga Ecco Van lo tlan nen chuan an intawk thut a, Rickshaw khalhtu hian a Rickshaw khalh lai rang taka veilama herh kawi chuan a bul hnai maiah mi In hungna rangva chu na takin a su a, a Passenger Lalchhanchhuahi hi Rickshaw atang hian invawrh chhuakin a nakruh bawr vel na takin a sawh nia hriat a ni. Chetsualna hmuna awm ten Civil Hospital Lunglei rang takin panpui nghal mahse a hliam hi tuar lovin Hospital thlen hnu reiloteah Lalchhanchhuahi hi a boral a Rickshaw khalhtu Zarzoliana pawh hian a lu lamah hliam nasa lutuk lo a tuar a ni.
Thu dawnnain a sawi danin Lalchhanchhuahi hi Inneihna a Mo thian ni turin Aizawl atangin Lungleiah a kal niin an sawi a, nizan khan a thlenna Lunglei Chanmari Vengah tlaivar pui anih hnuah vawiin khan Postmortem niin a ruang hi an chenna Aizawl panpui nghal a ni.
