MSU-in dan lova khaw dinte tihtawp anih theih nan hma la turin Sawrkar an ngen

24 Oct 2025: Mizo Students’ Union (MSU) chuan Mizoram chhunga Dan lova khaw din awm mekte chu kumin chhung ngei a tihtawp a nih theih nana hma la turin Mizoram Sawrkar an ngen.

Vawiin khan MSU chuan Aizawl Press Club-ah thuthar thehdarhtute kawmin, Mizoram chhunga dan lova rawn pem lutten  an duhna hmunah inbawk khawma khua an din leh ringawt thin chu tha an tih loh thu an sawi. MSU chuan heng dan lo va khaw din hrang hrangte hi an zirchian hnuah khaw eng emaw zatah hian Sawrkar hmalakna (School, Power Supply, Health, Water Supply) a awm tih hriat a ni a, hei hi MSU chuan pawi an tih thu sawiin, MSU chuan heng dan lo va khaw dina development hrang hrang pek tawhte hi titawp vek turin sawrkar an ngen tih an sawi.

Vawiin thuthar thehdarhtute an kawmnaah vek hian MSU chuan Mizoram sawrkar hnuaia Assistant Professor a ngheta lak (Direct Recruitment) kum 20 chuang a awm tawh loh hnuah, sawrkarin Assistant Professor post 31 la tura hma a lakna chu lawmawm an tih thu an sawi a. MSU chuan Mizo thalaite’n an lo nghahhlelh em em Assistant Professor hnaah hian a ram leilung fate ngei kan luh theih nan Non-Mizo (hnam dang)-te’n dil buai lo turin an ngen tih an sawi bawk a ni. (DD)