Myanmar a chengte nena zalen taka inkalpawh theihna hlih leh ramri hung tum duh lohna resolution pawm a ni
28 Feb 2024: Assembly inkhawm chuan vawiin khan Myanmar a chengte nena zalen taka inkalpawh theihna hlih leh ramri hung tum duh lohna official resolution chuan thlawp a hlawh hle a, lungrual taka pawm a ni.
Home Minister Pu K. Sapdanga chuan a official resolution – “Central Sorkar-in Free Movement Regime (FMR) tihtawp a tum leh Myanmar nena kan inrina, Border Fencing kalpui a tum hi tha kan ti lo va. Ti lo turin kan ngen a ni. Dik lo taka British Sorkarin Divide and Rule Policy hmanga Zofate min thendarh hi rorelna pakhat hnuaia kan kun leh theihna turin hma min lakpui zawk rawh se.” tih chu vawiin khan a pulut a. He resolution a putluh rual hian Pu K. Sapdanga chuan helna nasa tak tak India hmarchhaka a awm lai zawng zawnga ramri hung tum si lova, tuna hel pawl awm tawh mang loh hnu a helna chhuanlama ramri hung tum hi chhuanlam awmze nei lo a ni, a ti a. Ramri a awmte inkalpawh theihna hlih hian Mizo hnam inpumkhatna a tichhe thei a ni a ti a. Chubakah ramri a awmte tan ramri hung hi channa rapthlak tak leh an eizawnna tichhiatna tur a ni a ti bawk a. India sorkar hian British-in ramri a lo siam hi thiah a nih a, Mizo hnamte rorelna khat hnuai a an awm leh theihna tura khawvel dawhsan hrang hranga tanpuitu ni zawk turin sorkar laipui a ngen a ni.
Sawihona-ah hian sawitu member-te chuan he official resolution hi an thlawp vek a. Chawhma lamah sawihona hi zawh hman a ni lova, dar 1:00pm-ah chawlin dar 2:00pm-ah sawiho hi chhunzawm leh a ni a. Lungrual taka pawm a ni ta a ni. (AIR)
