Central Young Lai Association (CYLA)-in kar kalta Thawhtanni atang khan Myanmar lama phurh luh tur petrol leh diesel phurte chhun-zan-zawmin an la dang chhunzawm zel.
CYLA General secretary Pu Joseph Lalhmingthanga Chinzah chuan Aizawl, Lunglei leh Hnahthial atanga Lawngtlai district kaltlanga Myanmar lama diesel leh petrol phurh luh tumte chu Police bakah YLA mi tlawmngaite’n chhun zan zawmin hmun hrang hrangah an la dang niin a sawi a. Petrol pump 4 awmna Lawngtlai khawpui bakah Sangau leh Bungtlang South a filling station awmte atanga Myanmar lama petrol leh diesel phurh luh khap a ni bawk. Hetianga Myanmar lama to tak taka hralh tur petrol leh diesel phurh luh hi an khap chhung chuan a veng turin an duty dawn thu CYLA hruaitute chuan an sawi.
Kar kalta Thawhtanni khan CYLA chuan Myanmar lama bungrua, a bik takin petrol leh diesel phurh luh hi tiam chin awm lova an khap thu an chhuah a. A hlawm a petrol leh diesel tam tham tak taka phurh chhuah anih avang hian mipui mimir leh Lawngtlai district a hmasawnna hna thawktu company leh contractor-te’n harsatna an tawh phah nasa hle niin an sawi a. Hei bakah hian Myanmar a mipui rorelna din tura Chin pawl indinte chu hetiang eitur leh petrol leh diesel lo hmangtu Arakan hel pawlte’n an rap betin an kap thin a. Ti tawh lo tura an tih hnu pawhin an sim duh chuang lo a ni, an ti.
A hma May ni 25 khan Myanmar a bungrua, a bikin petrol leh diesel thawn luh hi CYLA te chuan an lo khap tawh a. Arakan Army leh United League of Arakan (ULA) hruaitute nena an inbiak hnu-ah June ni 11 khan bungraw phurh luh khapna hi hlih a ni a. Mahse, Arakan hel pawlte hian an intiamna ti hlawhtling lova Chin state chhim lama Chin pawlte an la kah zui zel avangin June ni 24 atang khan bungraw lakluh hi khap chhunzawm leh a ni ta a ni.
Lunglei district DCSO leh Siaha district bawrhsap pawhin petrol leh diesel man to zawka hralh leh tura lei khawl vak vak khapna hi an lo chhuah tawh a. Hei hi mipui leh hmasawnna hnathawktu company liante’n harsatna an tawh nasat vang niin an sawi a ni. (AIR)
