19 Aug 2025: Mizo Zirlai Pawl Headquarters:Lunglei chuan New Education Policy (NEP) 2020 hnuaia State tinte’n mahni State University neih a ngaih tawh avanga tun hnaia Mizoram Sorkarin Mizoram State University awmna atana Aizawl-ah bawk hmun a zawng leh chu hriatthiam har a ti hle a. Zirna kawnga hmasawnna rual khai zawk a awm theihna atan Mizoram Sorkar chuan Mizoram State University chu Lunglei-ah dah rawh se, tiin thuneitute a ngen.

MZP Hqrs.:Lunglei chuan ni 8 August, 2025-a Mizoram Larsap-in Lunglei a lo tlawh ṭum khan Mizoram State University Lunglei-ah dah anih theihna atan lehkha a theh lut tawh bawk. Tun dinhmunah hian Aizawl-ah heng zirna in lian bikte hi a awm mêk a ni:

1. MZU

2. ICFAI UNIVERSITY

3. NIT

4. LAW COLLEGE

5. Nursing College

6. RIPPANS

7. IASE

8. Hindi Training College

9. ZMC

10. Vety College

Hetiang anih laia Aizawl-ah bawk Mizoram State University dah tum a ni hi Mizoram-a zirna kawnga hmasawnna rual khai zawk kan neih theihna daltuah MZP Hqrs.:Lunglei chuan a ngai a. Mizoram Chhim lam aṭanga zirlaite’n mahni khawtualah ngei an zirnate an chhunzawm theih nan Mizoram Sorkar chuan Lunglei-ah Mizoram State University hi dah turin a ngen a ni.

MZU Southern Campus atana ram awm sa 1394461.91 sq.m lai a zau chu Mizoram Sorkar hian Mizoram State University dinna hmun atana hmang turin MZP Hqrs.:Lunglei chuan a ngen a.  Mizoram State University hi Lunglei-a dah a nih ngei theihna atan MZP Hqrs.: Lunglei chuan theihtawpin hma a la chhunzawm zel a, H&TE Minister Dr.Vanlalthlana hnenah pawh vawiin hian Mizoram State University chungchangah hian lehkha a thehlut a, MZP Hqrs.:Lunglei chuan Chhim lam mipuite duh ang ngeia hma la turin Mizoram Sawrkar chu a beisei tlat a ni. Mizoram State University hi Lunglei-a dah a nih ngei theihna atan a tawp thlengin MZP Hqrs.:Lunglei chuan hma a la chhunzawm dawn, tih thuchhuah a siamah hian a tarlang.