19 Sept 2025: Vawiin khan Mizo Zirlai Pawl Headquarters: Lunglei chuan ATL kawng (Lunglei-Kanghmun S) a enfiah.
Kawng enfiahnaah hian PWD hotute kawmin, tun dinhmunah ATL kawng siam hna ṭan anih hma hian PWD Lunglei lamin pot-hole hnawh hna an thawk mek a, PWD hotute hian ATL kawng siam hna hi November thla aṭanga thawh ṭan tura ruahman anih thu MZP Hqrs:Lunglei an hrilh a ni.
MZP Hqrs: Lunglei chuan Lunglei leh Kanghmun S inkara lei min then fai loh eng emaw zat awm chu a rang lama thian fai turin thuneitute a ngen a, lung lakna hmun Haulawng – Dawn kawng inkara quarry-a thubuai awm mek chu Sawrkar thuneitute’n a rang lama chingfel turin MZP Hqrs:Lunglei chuan a ngen nghal bawk.
Mizo Zirlai Pawl Headquarters:Lunglei chuan hna ṭan anih aṭanga a tawp thlengin kawng siam hna hi a vil dawn tih a sawi a ni.
