01 May 2025: Vawiin ni 1 May, 2025 (Ningani) chawhnu dar 12:30 –a MZP Hqrs Lunglei Emergency Meeting neih chuan sawrkar aṭanga an thil phut ATL road siamna tur sum pawh pen dah let tura a ngiat Rs vbch 44.89 aia tam Rs vbch 58.99 an dahna order bakah CRRI mithiamte’n zirchiang tura ruahmanna an chhawp chhuah leh tuna sawrkarin an sum dah baka a daih loh chin zawng pawh dah zel a nih tur thu an dawn avangin meeting chuan ngun taka ngaihtuahin, Total Bandh neih tura ruahmanna a lo siam tawh chu a ‘Call-Off’ ta a ni.
Meeting Chairman MZP Hqrs Lunglei President Pu Johan Hmangaihzuala chuan hmalakna an neih chhung zawng a theihtawp chhuaha thlawp tlattute leh thil pek petute zawng zawng chungah lawmthu a sawi a, Lunglei leh Chhim mipuite ṭanrualna vang liau liau a nih thu a sawi bawk.
Mizo Zirlai Pawl Headquarters Lunglei chuan hmalakna a neih chhunga mipuite leh khualzinte harsatna a thlen avangin an hriatthiamna a ngen a. Hmalak a nih ṭan tirh aṭanga theihtawp chhuaha thlawp tlattu pâwl hrang hrangte leh Chhim mipuite inpekna vang liau liau a hlawhtlinna hi chang a ni tih inhriain, an chungah lawmthu a sawi a ni.
Hetih rual hian MZP Hqrs Lunglei chuan Sawrkar chu a intiamnaah a ding nghet em tih a enfiahin a enzui zel dawn thu leh Chhim mipuite tana kawng ṭangkai tak ATL road hi an siam tirh aṭanga a tawp thlengin a vil zui zel dawn thu a sawi bawk.
