MZP Hqrs Lungleiin Lunglei Police SIT, FSL leh Mualthuam N khawtlang chhuanawm an ti

21 Aug 2026: Mizo Zirlai Pawl Headquarters, Lunglei chuan thuchhuah siamin, Ni 3 August, 2026 (Thawhtanni) zan a bo, H. Ramdinpuii (15) d/o H. Lalawmpuia Mualthuam ‘N’ khua rawng taka thattu Denghmingthanga (20) leh Lalneihkima te man chhuah an ni ta hi MZP Hqrs.:Lunglei chuan lawmawm a ti hle a, tualthattute zawn chhuah an nih theihna atana theihtawp chhuaha hmalatute Lunglei Police Special Investigation Team leh Forensic Science Laboratory-te thawhrimna leh inpekna chu chhuanawm an ti tak zet bawk tih an sawi.

MZP Hqrs.:Lunglei chuan tualthattute man chhuah an nih theihna atana hnuchhuitute thlawp tlat leh chak taka hmalak anih theihna atana Mualthuam ‘N’ khawtlang thawh hona leh inpekna chu fakawm an tiin, khawtlang hruaitute zai ngai chunga hun khirh tak karah khawtlang mipuite chet lak dan chu a chhuanawm an tih thu an sawi bawk.

H.Ramdinpuii tualthahnaa mawhphurtute hi a na thei ang bera hrem an nih theihna atan MZP Hqrs.:Lunglei chuan thuneitute an ngen a, kan zirlai pui H.Ramdinpuii tualthihna chungchangah hian hmalak chhunzawmna tur a awm anih chuan MZP Hqrs.:Lunglei chuan theihtawp chhuahin hmalak chhunzawm zel a inhuam reng a ni, an ti.

H. Ramdinpuii’n a kalsan tak a chhung leh khat laina leh thenrualthate, Pathian awmpuina leh thlamuanna chang zel turin an duhsak tak zet a, Mizoram mipute’n he tualthihnain a nghawng zawng zawngte tan thlah lova tawngtainaa hre reng turin MZP Hqrs.:Lunglei chuan a ngen tih an sawi bawk.