27 Nov 2023: Delhi-a cham mek MZP General Headquarters President Pu H Lalthianghlima chuan vawiin khan Union Minister of State for Minority Affairs Pu John Barla chu a chenna inah hmuin Mizo zirlaite tana thil pawimawh hrang hrang a thlen.
MZP President chuan Union Minister John Barla hnenah hian, Mizo Zirlai tam tak khawsak harsatna avanga zirna sang zawk chhunzawm thei lo an tam thu a thlen a, Zirlaite Hostel tam zawk Mizoram-ah kan mamawh thu a thlen a ni.
MZP President chuan, PMJVK Scheme kaltlanga nasa zawka zirlaite harsatna sukiang tura pui turin a ngen a, hemi kawngah hian MZP pawhin theihtawp chhuaha zirlaite tan hma an lak thin thu leh theihtawp chhuahpui chhunzawm zel turin a ngen bawk.
MZP President chuan, Mizo zirlaite thiamna leh theihna haichhuah a nih zel theihna tur leh zirnaa hma an sawn theih nan an harsatnate sukiang tura hmala turin Union Minister of State hi a ngen a ni.
MZP President hi Rajya Sabha MP Pu K.Vanlalvena’n a kalpui a, Rajya Sabha MP chuan zirlaiten hostel an mamawh nasat thu leh MZP hian zirlaite harsatna hrang hrang a buaipui thin thu a thlen a ni.
MZP President hi NGO Co-ordination Committee hminga Mizoram Inthlanpui Vote chhiar hun sawn tura ngen tura, Election Commission of India dawr tura November 23, 2023 a Delhi kal zingah telin, tunah hian Delhi-ah an cham mek a ni. (AIR Aizawl)
