22 Sept 2025: Vawiina MZP Conference Hall-a OB charge an inhlannaah MZP President thar Dr. C.Lalremruata chuan kum 2025-2027 inkara MZP hmachhawp sawiin, Mizo Zirlai Pawl an nih angin zirna leh a kaihhnawih an ngaihpawimawh hmasak ber tur thu sawiin, Mizoram chu kum 15 chhung ziak leh chhiar tam ber state ni tawh mah se central service a inziak tling pakhatmah an awm lo va, ziak leh chhiar thiam ringawt chu hmasawnna a ni lova, thiamna tak tak nei zirlai lehkhathiam hmantlak an awm theih nan hma an la dawn a ti.
Mizo zirlai zawng zawngte hman theih turin student aid fund siam an tum a ti a, zirlaiten an zir zawha company hrang hranga hna an hmuh theih nan Mizorama a vawikhatna atan placement agency te nen thawk hova hmalak an tum a ti a. Mizo zirlai ten nu leh pate thawhchhuah chauh ring a zirna chhunzawm lova Mizoram sorkar leh India sorkar bakah Foreign University hnuaia scholarship hrang hrang awm te hmanga zirna an chhunzawm theih nan hmalak a ni dawn a ti a, MZP chu zirlaite tana innghahna tlak a nih theihna tura thawhho puiah a member puite a sawm a ni.
Tun thla September ni 3-a MZP Assembly vawi 65-na neih zawh taka MZP Vice President atana thlan Sanghmingthanga, General Secretary atana thlan C Lalhmingsanga, Asst secretary atana thlan Lalentlinga, Treasurer atana thla Rothanliana leh Financial Secretary atan thlan Nangsawmthanga te pawhin vawiin hian charge an la nghal a ni. (AIR)
