Naupang kutthlak lai video darh chungchangah a tuartu chhungte’n hetiang em em a nunrawnna thil tih hi tu chungah mah a thlen tawh loh nan kutthlaktu chungah hian rorelna dik tak hlen chhuah ngei an duh thu an sawi
Tunhnaia social media-a hmeichhe naupang kutthlak lai video darh chungchangah naupang sawisak tuartu chhung leh khatte chuan darkar 3 lai mai diriam taka an sawisa chu na an tih thu leh hetiang em em a nunrawnna thil tih hi tu chungah mah a thlen tawh loh nan kutthlaktu chungah hian rorelna dik tak hlen chhuah ngei an duh thu an sawi.
Naupang sawisak tuartu chhung leh khatte hian nimin khan Serchhip Press club-ah thuthar thehdarhtute kawmin hmeichhe naupang kut inthlak lai video hmuh hrehawm tak alo viral ta chu pawi an tih thu an sawi a, tun hnuah hetiang hi tu chungah mah thleng tawh lo se an duh thu an sawi a, diknain ro a rel chu an duh ber a ni, an ti.
He video a naupang sawisak hian thlavang hauhtu chhung leh khat a nei tih sawiin, an mahni tawrhpuitu Serchhip leh Mizoram mipuite chungah lawmthu an sawi a, an tawngtaina an thlamuan pui thute an sawi a, hetianga kut inthlaka insawisak hi darhchhuak lo Zoram chhung hmun tam takah a awm rin anih thu leh hetiang thleng tawh lo tur hian Kohhran leh khawtlang mipuite tanrual a pawimawh ni a an hriat thu an sawi a ni.
Naupang sawisak tuartu chhung leh khatte hian an thil duh leh an phutte sawiin, he thil thleng hi naupang engmah hre lo thil tih satliah mai mai angin lang mahse, sualna thuk takah an ngai a. Danin hremna pe ngei se tih chu an duhdan a ni a. Hemi chungchangah CWC leh Serchhip Police lamten theihtawp chhuaha thilsual titu manchhuah kawnga hma an lak vatna chu lawmawm an tiin lawmthu an sawi a. MHIP Sub-Hqrs, Serchhip pawhin he thil thleng an demnate chuan an thla a timuang hle a ni an ti.
An chenna veng atanga hmun fianrial, Km 1 dawn laia hlaa hruai fal a, nikhaw hre lova siam a, darkar 3 lai mai diriam taka an sawisa chu na kan ti a, a rulh let nan engmah man an tih loh thute, nasa taka sawisak a nikhaw hre lo em ema insiam nan chuan thu tling an hmuh loh thute, he thil thleng hian Mizo mipui rilru a tina a, a titu hi kum tling lo a ni tih pawh an hriain, dan anga hremna pek ngei an duh a, an phut tlat thu te an sawi a. Hetiang em em a nunrawnna thil tih hi tun hnuah tu chungah mah a thlen tawh loh nan leh a sim ngei theih nan kutthlaktu chungah hian rorelna dik tak hlen chhuah ngei ni rawh se, tih te chu an thil duh leh phut a nih thu an sawi.
Rorelna dik an hmuh theih nan hmalak zel an tum thu leh, hemi kawngah hian Mizoram mipui leh NGO hrang hrangte tawiawmna an ngen a, rilru lam thlenga harsatna a awm theih avangin Mizoram mipuite tawngtaipui zui zel turin an ngenin an sawm tih an sawi bawk.
