Nausen pakhat thih phahna bekang um-ah Typhoid thlen theitu natna hrik hmuchhuak
Tun hnaia Khumtung khua mi 67 laiin an eisual-a nausen pakhat thih phah Bekang um-ah khan khawsikpui (typhoid) thlen theitu natna hrik ‘Salmonella Typhi’ hmuhchhuah a ni.
Health & Family Welfare department-a Food & Drugs Administration Joint Director Pu Lalsawma’n Akashvani Aizawl a hrilh danin mithiamte Khumtung-ah kalin an bekang eisual sample kha lak a ni a. Chu chu Selesih-a College of Veterinary Science & Animal Husbandry-a an laboratory-ah endik a ni a. Laboratory-a endikna-ah hian bekang um-ah hian Salmonella Typhi natna hrik hi hmuhchhuah a ni ta a. Mithiamte chuan Salmonella Typhi hi khawsikpui thlen theitu bacteria a ni a, tui emaw eitur tihbawlhhlawh leh thianghlim tawk lovah a darh thei a. Mihringin a lem hnu-ah lo puangin, thisen kalkawngah a taidarh ta \hin a ni.
Khumtung khua-a chhungkaw engemawzatin March ni 9-a Kohhran pawl pakhata hmeichhe pawl sumtuakna atana zawrh an lei a. Hemi nî leh a tuk Pathianni-ah mi thahnem tak an dam loh phah avangin a na zual mi 45-te chu Aizawl damdawiin hrang hranga enkawl turin Khumtung Health Sub-Centre atanga thawn a ni a. Aizawl Civil Hospital-a enkawl lai kum 1 leh thla 9 mi Lalthansangi chu March ni 15 zan khan a thi a. Ani hi nausen mai a la nih avangin bekang um hi ei lo tura ngai an awm a, a nu hnute a hnek vanga thi-a ngaihna a awm chungin a chhungte kâ atanga hriat danin a ei ve niin a lang.
Bekang um eisual zingah hian mi 2, State Referral Hospital, Aizawl Falkawn-a enkawl mekte tihloh chu dam takin damdawiin atangin an chhuak vek tawh a ni. (AIR)
