NEDFi-in Cyclone Remal avanga Mizoram a chhiatna tawkte tanpuina atan Rs nuai 25 an hlan
11 June 2024: North Eastern Development Finance Corporation Ltd (NEDFi) chuan an CSR fund atangin tunhnaia Cyclone Remal avanga Mizoram a chhiatna tawkte tanpuina atan Mizoram NGO pakhat ‘Mission Foundation Movement’ hnenah Rs nuai 25 an hlan. He hun hi Chief Minister Office-ah hman niin, Mizoram Chief Minister Pu Lalduhoma chuan Rs. Nuai 25 Cheque hi Mission Foundation Movement-te hnenah a hlan a ni.
Chief Minister chuan hetiang zat Mizoramin tanpuina a dawn theihna tura hmalatu NEDFi CMD Pu PVSLN Murty hnenah lawmthu a sawi a. Pu Ashim Kumar Das, General Manager, NEDFi chuan NEDFi-in Mizorama Entrepreneur-te hmasawnna tura theihtawp an lo chhuah tawh dante tarlangin, CSR fund atanga Sesawng khuaa changel kawr hmanga thilsiam an zirtir chungchangte pawh a sawi a. Mission Foundation Movement Project Coordinator Pu Caleba Lalnunpuia chuan lawmthu sawiin tanpuina an dawn chu dik leh felfai taka an hman tur thu kalkhawmte a hrilh a ni.
NEDFi Aizawl Branch Manager, Pu Lalhruaizela Fanai chuan NEDFi chuan Entrepreneurs te tan loan interest rate hniam tak kum khat a 7% a pungin an pek thin thu a sawi a, Loan te atanga loan lian tak tak pawh an pek thin thu a sawi bakah, Mizoram a entrepreneurs te chuan loan an rulh that thu a sawi bawk.
