Nikum 2024 Jan – kumin Feb chhungin Lungleiah lirtheia chetsualnaah mi 14-in nunna an chan
18 Feb 2025: Mizoram Road Safety Council-in kumin 2025 February thla hi lirthei chetsualna laka him nana fimkhur tura inzirtir uar thla (Road Safety Month) atan a puan angin, tukin zingkar khan Lunglei Venglai Traffic Point-ah hemi pual hian hun hman a ni a, Lunglei District Additional Deputy Commissioner Pi Rochuangkimi Khenglawt chuan khuallian niin a hmanpui.
Pi Rochuangkimi Khenglawt chuan February thla puma Road Safety Month hmang tura sawrkar ruahmanna chuan lirthei khalhtu, hmangtu leh mipui kea kalte himna tur sawrkarin a ngaihtuah hle tih a lantir tiin, kumin Road Safety Month thupui, “Fimkhur leh him takin lirthei khalh ṭhin ang che” tih chu zawm ṭheuh turin lirthei khalh ṭhin zawng zawngte a chah a ni.
Lungleia Road Safety Month puala hun hman hi Lunglei District Transport Office-a SIS Pu H. Lalramchhana’n kaihruaiin, nikum chhunga an hma lakna report a pe a. Lunglei District Additional Superintendent of Police Pu K. Beihmotaosa pawhin an hmalaknate a sawi.
Traffic Incharge Pu Lalṭhabuanga kaihhruaiin kal khawmte’n thutiam (Road Safety Pledge) an sawi rual bawk.
Lunglei DTO office report aṭanga a lan danin, nikum chhung khan Lunglei District-ah lirthei kaihhnawiha dan bawhchhia man leh chawitir mi 426 an awm a, hemi aṭang hian Rs 6,95,000/- hmuh a ni.
Nikum 2024 January aṭanga kumin February thla thleng hian Lunglei Police te chhinchhiah danin Lungleiah lirtheia chetsualna ṭum 16 thlengin, he’ng chetsualnaah hian mi 14-in nunna an chan bakah, mi 18-in hliam an tuar a. Nikum chhung khan traffic dan bawhchhia mi 1,557 man niin, pawisa chawitir tling khawm chu Rs 19,51,700/- a ni.
Lunglei Police te hian lirthei khu chhuahna siam danglam (modified exhaust) an man sa chu Court phalnain 70 vel an tichhe ni tawh a, modified exhaust veh hna hi an la kalpui reng bawk.
