16 May 2024: Vawiin chhun khan State Level Sub Committee on Green Mizoram, 2024 chuan Conference Hall of Forensic Science Laboratory, MINECO-ah thutkhawmna hun hmangin nikum 2023 a hmalak tawhnate thlirhona hun bakah Green Mizoram Day 2024 agenda hrang hrang sawihona hun a hmang bawk. He thutkhawmna hi Pu H.Lalengmawia, Co-Chairman, SLSC ON Green Mizoram, Commisioner& Secretary, EF& CC chuan a kaihruai a, report ngaihthlak a ni bawk.
Vawiin thutkhawmna a committee thurelte thenkhat:-
1. Green Mizoram Day 2024 thupui (theme) atan “I nunna atan thing phun rawh” (Plant trees for your life) thlan a ni.
2. State Level leh District Level a kangmei veng tha District leh khua te chu kum dang a tih thin angin lawmman pek chhunzawm tura ruahman a ni.
3. A hmanna pui ber State level Inaugural function leh he ni puala thing phunna hmun atan Zokhawsang, Assam Rifle’s Complex chu thlan a ni.
4. Ramngaw humhalh kawnga thawk tha bik mi pathum hnenah chawimawina cash award Rs. 10,000/- theuh leh citation pek ni se. He thutkhawmnaah hian nikum lama hmalaknate thlirho a ni a.
Chhinchhiah dan chuan nikum khan thing tiak 29,839 phun niin, thing tiak 1,26,722 chu department hrang hrangah leh NGO etc hnenah sem a ni bawk.
