Nithum chhung awh turin Mass Casual Leave la ta

09 Sept 2025: Vawiin chawhma dar 10:30 khan Centrally Sponsored Scheme (CSS) hnuaia thawktu mi thahnem tak chu Sawrkar laka an lungawilohna lantir leh an thil phut nawrin Old Tennis Court Venglai Lungleiah an pungkhawm.

An punkhawmna a inkhawm tawi an buatsaih hi All Mizoram CSS Employee Coordination Committee (AMCECC) Sub Hqrs President Pu Lalmuanpuia’n kaihruaiin, CSS Regularisation Scheme; CSS hnuaia thawklote’n an hmang tangkai daih hi kan rilru a na takzet a ni a ti.

FEMSE Sub Hqrs President chuan thu sawiin, CSS thawktute regular a lak theihna dan a lo chhuaka kan lawm em em laia CSS hnuaia thawktute aia Health Worker 31 sawrkarin CSS sum hmang leh CSS regularisation Scheme hmanga an la hi sut leh turin sawrkar kan ngen a ni a ti. CSS thawktute hi hnathawh angaih hunah ‘nangni lehkhathiam’ tiin hmathehah min hmanga duhsak hunah duhsak kan ni leh si lo, chuvanga hetiang thil hi vawiina lo thleng ta a ni a, kan thil phutah hian a tawp rat thlengin kan tang dawn, a ti.

Thu sawitu dang NEUM Sub Hqrs President chuan, kan thil nawr leh phutte avang hian mipuite tan harsatna tam tak kan siam tih kan hriaa min hriatthiamna kan ngen a ni, tiin advertisement mumal tak hmanga dan anga lak kan nih ang ngeiin kan sawrkar pawh hi inngaihtuah tha leh turin kan duh a ni, a ti.

Lunglei District-ah hian CSS hnuaia thawk Department 17-ah mi 2000 chuang awmin, an lo ruahman lawk angin Mizoram puma CSS hnuaia thawktute chuan vawiin atangin nithum chhung Mass Casual Leave an la dawn a ni.

Casual Leave an lak avang hian Department tam tak a nghawng dawn a, a bik takin Education Department leh Health Department-ah nghawng nasa tak a nei dawn niin an hruaitute chuan an sawi.