19 July 2025: Tunlai hian Lunglei khawpuia Petrol Pump hrang hrangte chuan duhthusamin oil dahkhawl an nei tam tawk lo va, a bikin petrol chu pekchhuah tur an neihloh zeuh zeuh thin bakah Permit a pekchhuah chang leh Free sale a pekchhuah a inchhawk deuh reng.
Chanchin buatsaih lai hian Mizofed Pump AOC-ah petrol permit niin diesel free sale niin, Jedaz Pump Zotlang, T-way Filling Station Theiriat leh Zodingliana Filling Station TNT ah te petrol leh diesel an free sale a, Sianglinga Filling Station erawh an la khar rih. Vawiin lam hian Jedaz Pump Zotlangah petrol lak tum an thahnem hle a, Theiriat leh TNT lamah erawh oil thun lirthei chuti lutukin an tam lo. Mizofed Pump AOC-ah naktuk lam hian petrol trip khat a thlen an beisei.
Mizofed hian Petrol phur tanker pathum (36000 ltrs) leh Diesel tanker pakhat (12000 ltrs) kawnga rawn thang mek an nei. Strike hmaa challan siam anih avangin tuna strike hian a huam ve dawn lo. Jedaz Pump pawhin MS 24KL leh HSD 12KL lo kal mek an nei bawk. Hetiang hian petrol pump dangte pawhin load lo kal mek an neih beisei a ni.
Hetihlai hian Kawnpui leh Sairang inkar kawng chhia chu siamthat anih hma chuan Mizoram Oil Tanker Driver Association (MTODA) chuan vawiin atangin an tlan rih dawn lo tih an sawi.
