Opposition Leader-in ZPM sorkarin SASCI sum pe chhuak mai lovin a suasam chiam niin a sawi
May 8, 2024 : Mizoram Legislative Assembly Opposition Leader Pu Lalchhandama Ralte chuan ZPM sorkarin SASCI sum pe chhuak mai lovin a suasam chiam tih sawiin hemi chungchangah hian Mizoram Larsap mai bakah Sorkar laipui lamah pawh bawhzui zel an tum thu a sawi.
Vawiina MNF MLA-ten Aizawl Press Club-a Chanchinbu mite an kawmnaah Pu Lalchhandama Ralte chuan he thu hi sawiin, tun thla May ni 3-a Chief Minister Pu Lalduhoma’n Press Conference a neihah Zoram mipuite hmaah thu dik tawk lo chiang takin a sawi ni awm angin a tarlang tih a sawi a. Chief Minister chuan MNF Sorkar lai kum 2022 atanga 2023 a SASCI Part I sum Rs Vaibelchhe 200 lapse ang a a sawi chu thu dik lo a nih thu leh hemi kum vek hian Mizoram tan Rs Vaibelchhe 400 pekchhuah a nih bakah Rs Vaibelchhe 400 hmanga hna siam chu tender hmanga contractor te thawh tir an nih bakah hna tha taka an thawh thu a sawi a. Hei bakah hian kum 2023-2024 ah Sorkar laipui hnuaia Finance Ministry-in Mizoram tan SASCI hnuaiah Rs vaibelchhe 500 a ruahman leh thu leh a hma a bill pek fell loh tihfelna atan Rs vaibelchhe 200 chu ruahman tel a nih thu a sawi a ni.
Pu Lalchhandama Ralte chuan MNF Sorkar lai September ni 6, 2023 ah kum 2023-2024 atan Mizoram Sorkar chuan SASCI – I sum Rs nuai 46,255 a dawn bakah February ni 2 2024-ah Mizoram Sorkar-a Finance Department chuan Rs Nuai 414 a dawn leh thu te, MNF Sorkarin Rs vaibelchhe 200 chu SASCI hnathawktu department-ah te a pek nghal thu leh SASCI sum bang Nuai 26,669 chu Model Code of Conduct a awm avanga Finance Department in a kawl zui tak thu te a sawi bawk a ni. (AIR)
