2-Dampa (ST) AC By-Election vote tla 83.07%

12 Nov 2025: 2-Dampa (ST) AC By-Election chu nimin khan boruak muanawm tak hnuaiah tluang taka zawhfel a ni a, vote tla hi 83.07% a ni.

2-Dampa (ST) Assembly Constituency huam chhungah hian Voter mipa 10637, hmeichhia 10231 an vaiin mi 20,888 an awm a, heta tanga vote tla zat hi Mipa 8921 leh hmeichhia 8430,an vaiin mi 17,351 niin hei hi 83.07% a ni a. Hetah hian Postal Ballot hmanga vote tla chhiar tel a la ni lo a ni.

2-Dampa (ST) AC By-Election neih zawh takah hian Hruiduk Polling station chu vote tlak thatna ber niin 93.09% a tla a, Zopui Polling station chu a tlakchhiatna ber niin 75.86% a tla thung a ni.

Tarlan tawh angin 2-Dampa (ST) AC hian Polling station 41 a awm a, inthlanna tluang taka neih zawh anih hnuah Polling Station hrang hranga EVM & VVPAT hmanga vote tla te hi venhimna tha tak hnuaiah District Election Office zing dar 4:27 khan thlen felpui niin, EVM & VVPAT te hi Vote chhiar ni 14th November, 2025 a lak chhuah turin strong room-ah uluk tak leh venhimna tha tak hnuaia awm turin dah luh nghal an ni. (DIPR)