C.Ṭhuamluaia Muala eng vuahna tur SYS Minister-in a enfiah

14 Nov 2026: Tukin khan Mizoram sawrkara Sports & Youth Services (SYS) Minister Pu Lalnghinglova Hmar chuan Lungleia C.Ṭhuamluaia Muala zana inkhelh theihna tura eng vuahna (Installation of Lighting System at C. Ṭhuamluaia Mual, Lunglei) tur hmunhma chu a hmunah kal chilhin a enfiah.

Sports Minister Pu Lalnghinglova Hmar hi Lunglei West bialtu MLA Pu T. Lalhlimpuia, Lunglei South bialtu MLA Pu Lalramliana Papuia leh Lunglei Municipal Council (LMC) Vice Chairman Pu K. Lalrinawma te bakah, Mizoram State Sports Council (MSSC) official-te, Lunglei District Sports Committee (LDSC) leh Lunglei District Football Association (LDFA) hruaitute, political party hruaitute leh khawtlang hruaitute’n an ṭawiawm a. C. Ṭhuamluaia Mual kah enna tur, floodlight vuahna tura hmun hual lawkte a remchan dan tur a hmunah en hovin, tluang tak leh chak taka hma lak a nih theih nana rawtna leh ruahmanna hrang hrangte an sawi ho.

Sports Minister Pu Lalnghinglova Hmar chuan hna chu rang taka kalpui ṭan theih beisei a nih thu leh tun ṭhal chhunga thawh theih beisei a nih thu a sawi a. Lunglei mipuite tan leh infiam mi ṭhalaite tan sawrkar chuan a hma thei ang bera tihpuitlin a duh tih sawiin, a puitlin hun a nghahhlelhawm tawh hle a ni, a ti.

C. Ṭhuamluaia Muala lighting system siamna tur atan hian SASCI 2026–2027 Part-I (Untied) hnuaiah Rs Nuai 500 dah niin, thuneitute aṭanga pawmpuina (administrative approval) chu September ni 21, 2026 khan hmuh a ni a. Hna thawhna tura buaipui ngaite buaipui zui mek a ni.

C. Ṭhuamluaia Mual, Lungleia eng vuahna tur ruahmanna, Plan & Estimate siam a nih hma hian LDSC Office Bearer ṭhenkhatte leh MSSC Engineer te’n a hmunah en hovin, Stadium High Mast hi hmun li-a dah tura ruahman a ni a. Eng vuahna tur high mast hi Mual zawl aṭanga metre 28-a sang tura ruahman niin, Mual thlang lama ban pahnih chu a thlang kawngpui zawl (level)-a phun a ngaih dawn avangin leh Mual aia metre 7-a a hniam zawk avangin high mast hi metre 35-a sang phun a ngai dawn a. Mual chhak lama high mast pahnih chu Mual chhak kawng zawla phun tura ruahman niin, kawngpui hi Mual aia metre 11-a sang a nih avangin chhak lam high mast pahnih hi metre 17-a sang phun tura ruahman a ni thung.

High mast pakhatah hian 800w Sports lighting floodlight (LED) sawm li (40 nos) zel dah tura ruahman niin, high mast pali atan a zavaiin floodlight (LED) 160 dah tura ruahman a ni a. He’ng floodlight chawm tur hian Mual sir chhak lam kilah Generator 250kVA, 3-phase dah tura ruahman a ni bawk a. High mast dahna tur hi a hmunhma a rem loh hlawm avangin lei laih ngai leh lungrem ṭhiah ngai te a awm dawn a, he’ng thawhna tur leh siam ṭhat lehna tur hi earthwork leh retaining wall te ruahman tel a ni bawk.