Cancer tamna Mizoram in Food Testing Laboratory changtlung a mamawh dan sawipui

03 Aug 2026: New Delhi-a cham mek Health Minister Pi Lalrinpuii chuan vawiin khan Food Safety and Standards Authority of India (FSSAI) Chief Executive Officer – Shri Rajit Punhani, IAS chu FDA Building, New Delhi ah hmuin, Mizoram in Food Testing Laboratory changtlung zawk a mamawh dan a sawipui.

Mizoram hi a mi cheng zat za zela chhutin India ram pumah Cancer tamna ber state a nih mek thu sawiin, Pi Lalrinpuii chuan ram changkang zawkte anga kan ei leh in tur – thlai leh thei hrang hrangah mihring tana thalo chemical residue a awm leh awm loh uluk taka test reng kan mamawh, a ti a. Ei tur siam license pek theihna tur tawk vel laboratory mai ni lo, mipuiten an ei leh in tur zawng zawng, siam sa leh siam lohte thlenga a him tawk leh tawk loh an hriat theihna tura surveillance tha leh chumi support tur laboratory tha kan mamawh thu FSSAI CEO hi a hrilh a ni.

Shri Rajit Punhani, IAS, Chief Executive Officer, FSSAI chuan tha taka lo dawngsawngin, food safety chungchang pawimawhzia hriaa Minister ngeiin Mizoram mamawh a rawn thlen chu lawmthu a lo sawi a. Laboratory tha zawk neih theihna tura proposal leh tul dangte ngaihtuah tur technical team a rang lama Mizorama tirh a tum thu a lo hrilh nghal a ni.

FSSAI lamin building sakna an tum theih loh avangin Sawrkarin laboratory building tur erawh chu an ruahman a ngaih tur thu CEO chuan Health Minister hi a hrilh a. Ruahmanna awmsa te pawh a hmunah rawn enchian tir nghal a tum thu sawiin, a rang thei ang bera hmalak nghal an tum thu a lo hrilh a ni.

Minister hi Pi Lalzarmawii, IAS, Commissioner & Secretary, SW&WCD, Health & Family Welfare; Pu H. Lalhruaitluanga, PS to Minister leh Dr Hmingthankimi, OSD, NHM ten an tawiawm a ni. (DIPR)