Chief minister-in college bus pek a tum

31 July 2026: Vawiin khan Chief Minister Pu Lalduhoma, Law Minister ni bawk chuan Government Mizoram Law College Student Bar Council ten zirlai pass chhuakte thlahna leh a lut tharte lawmna hun (Freshers Social & Felicitation) an College-a an buatsaih a hmanpui a. Zirlaiten an mamawh an lo dil College Bus pek a tum.

Thusawiin Chief Minister chuan, khawvel a changkang zel a, mi tinin kan dikna chanvo kan ngaihlu tial tial a, Dan lam thiamte kan mamawhna a pung zel a ni, a ti.

Law behchhana hnathawktute hi mimal zalenna te, rorelna dik leh mipui sorkarna, kan ram kalphung lian pathum insuihfinna laia hnathawktute an ni a, ram danpui humhimtu, khua leh tuite dikna vengtu leh rorelna dik chelh dingtute an ni. Chuvangin, Law graduate tan hnathawh theih a tam a ni, a ti.

Zirlai kal chhuak turte chu an degree ni lovin an hnathawh atang zawkin an teh dawn a, taima taka in inzir zui zel a ngai a, in nun pawh in uluk a tul a ni, a ti a. Zirlai lut tharte pawh lawmpuiin, hlawhtling taka zir chhuak turin duhsakna a hlan.

Student Bar Council chuan Chief Minister hi College Bus an lo dil a, an hman lai chu kum 2005 a mi a nih tawh thu an sawi a. Chief Minister hian pek a tum thu a hrilh a ni.

Freshers Social & Felicitation-ah hian Principal Dr. Esther L. Chhangte pawhin thusawiin, Chief Minister-in an programme a hmanpui avangin lawmthu a sawi a, an college-ah hian zirlai 180 leh teaching faculty 11 an awm thu a sawi a. Teaching leh non-teaching faculty zawng zawng hi hmeichhia vek an ni. (DIPR)