CSR kaltlangin a thlawnin lung zai leh dawn

Nimin 12.10.2026 (Thawhtanni) chawhnu khan Health Minister Pi Lalrinpuii chuan Sri Ramachandra Institute of Higher Education & Research Institute (Deemed University), Chennai tlawhin, Mizoram atanga CSR kaltlanga a thlawna lung zai tur mi 8 awm mekte chu, an awmna ward-ah a kan. Mahni sum sen ngai lova Mizorama damlo miretheite tana an luangchhuak leh ta chu lawmawm a ti a, damlote chu doctor leh nurse-te thurawn lo zawm zel turin a fuih a ni.

Heng damlote hi thla hmasaa Sri Ramachandra Institute of Higher Education & Research Cardiology Department-ten ZMCH a Free Cardiology Camp an rawn neihna atanga lung zai ngai an hmuhchhuahte an ni a, tunah hian first batch mi 8 an ko mek a ni.

Kum 2024 khan a thlawna lung zaina hi lo buatsaih tawhin, hemi tum hian mi 33 an zai a; tun tumah hian mi 35 tal zai leh theih an inbeisei a ni. Lung zaina senso hi anmahni Sri Shankara Heart Foundation CSR fund leh Golden Card tangkawpin, damlo te tan kalna man bak senso awmlo tura hmalak a ni a; an haw lam senso thlengin tumsak an tum a ni.

Health Minister Pi Lalrinpuii hi Sri Ramachandra Institute atangin Smt Samyuktha Venkatachalam, Trustee; Prof JSN Murthy, Professor Eminence; Dr Lalthutiamngheti, Sr Lecturer leh an thawhpui ten an lo dawngsawng a. Hetianga mi rethei te tana luangchhuak thin Hospital an ni leh,  Mizorama mi rethei tak takte pawhin an zar an zo chu lawmawm a ti a; Sri Ramachandra Institute of Medical Science, Chennai chungah Health Minister chuan lawmthu a sawi a.  Hun lo kal lehzel turah pawh thawhhona tha zawk an neih theih ngei a beisei thu a sawi bawk.