H Ramdinpuii ruang postmortem niin sunna inkhawm neih a ni

06 Aug 2026: Nimin lama thi a hmuh H.Ramdinpuii (15) Mualthuam North ruang chu vawiinah Lunglei Civil Hospital-ah Postmortem a ni.

Vawiin chawhma lam khan H. Ramdinpuii ruang hi an khua Mualthuam North atangin Lunglei thlenpui a ni a, Civil Hospital Lungleiah postmortem (PME) a ni.

Civil Hospital kawtah hian MSU Regional Hqrs hmalaknain zirlai thahnem tak leh MHIP Sub Hqrs Lunglei hruaituten Ramdinpuii ruang hi lo hmuakin tawrhpuina leh thlavang hauhna Placard leh Poster chi hrang hrang an keng a ni.

Postmortem zawh hian Ramdinpuii ruang hi Civil Hospital Auditorium-ah sunna inkhawm tawi neihpui niin, MHIP Sub Hqrs Lunglei leh Branch YMA Mualthuam North hruaitute’n an kaihhruai a.

Sunna inkhawmah hian YMA Sub-Hqrs Lunglei, MHIP Sub-Hqrs Lunglei, MSU Regional Hqrs Lunglei, MZP Hqrs Lunglei, LMC hruaitute bakah Political Party hruaituten tawrhpuina leh thlamuanna thu an sawi a. Hemi hnu hian mimal leh pawl hrang hrang aiawhten ralna pawisa leh pangpar hlanin, Sunna inkhawm zawhah Ramdinpuii ruang hi an khua Mualthuam North panpui a ni a, vawiin tlaia vui tura ruahman a ni.