Leitlangpui Welcome Gate siamna tur hmun en ho

Lunglei, 2026 Khuangchawi Thla ni 24: Tukin khan Lunglei Beautification Committee (LBC) member-te – Health & Family Welfare Minister Pi Lalrinpuii, Lunglei High Powered Committee (HPC) Vice Chairman & LBC Chairman Pu V. Malsawmtluanga, Lunglei Municipal Council (LMC) Executive Councillor Pu Zorinsanga Hmar, Councillor Pu R. Lalremsiama leh Pi Lalmuanpuii Renthlei te chuan Lunglei hmar lam kawtchhuah, Pukpui daia khualzinte lo lawmna tur, Leitlangpui Welcome Gate siamna tur hmun chu a hmunah kal chilhin an en ho va. Pukpui Local Council aiawhte leh political party hruaitute’n an ṭawiawm.

Lunglei Beautification Committee-ah hian Lungleia MLA pali te bakah, LMC councillor zawng zawng (mi 11) chu member niin, an hma lakna hmasa ber atan Lunglei khawpui luhka hmun hnih – Pukpui khaw dai leh Zobawk khaw daiah te “Welcome Gate” hi siam turin an ruahman a. Minister Pi Lalrinpuii chuan he Welcome Gate siamna atana senso tur hi member-te’n an thawh khawm thu sawiin, hemi bakah hian Lunglei khawpui chhung chu mawi taka a lan theihna turin lungrem (retaining wall) awmte mahni bial ṭheuhvah a bialtu MLA leh councillor ṭang hova rawng hnawih thar leh an tum thu leh hmun ṭhenkhatah phei chuan hma lak ṭan a nih tawh thu a sawi.

LBC Chairman Pu V. Malsawmtluanga chuan ATL Road siam mek chu kawng ṭha leh tlo tak a nih theih nan sawrkarin theih tawp a chhuah thu sawiin, kawngpui ṭha neih leh Welcome Gate thar siam tur chu a inhmeh dawn hle tih a sawi a. Welcome Gate siam chu India ram khawpui lianah te pawh an uar thu sawiin, Pukpui daia ṭawngṭaina hmunah ngei hmar lam aṭanga khawpui luhka siam a ni tur chu lawmawm a tih thu leh khualzin te chawlh hahdamna hmun nuam tak a nih a beisei thu a sawi.

Lunglei Beautification Committee hotute chuan LBC ṭhu khawmin a lo rel tawh angin Lunglei khawpui chei mawina kawnga hma lak zelna atan LMC Chairman Pu Lalzuithanga kaihhruaina hnuaiah NGO-te leh heti lama tui mite nen inrawn khawmna (consultative meeting) buatsaih thuai tum a nih thu an sawi.

Leitlangpui Welcome Gate hi Arch. C. Lalhmangaihzuala, CCK Architecture, Salem Veng, Lungleiin a duan (design) niin, a siam dan tur ruahmanna a sawi fiah nghal a. He Leitlangpui Welcome Gate siam nan hian cheng nuai 11.73 ruahman chhin a ni.

Leitlangpui Welcome Gate siam tur hi a liang san zawng hi fit 18 leh a chanve, a chhipah fit 27 leh a chanve leh a zau zawng a chhung lamah fit 31 tura ruahman niin, ⁠RCC hmanga siam tur a ni a. Lung leh thing hmanga chei tur niin, thuziak eng thei (LED signage) leh a chhehvel kap eng tur eng vuah tur a ni a. Khualzinte hip leh titlangnel thei turin Tawlhlohpuan zia leh Mizo hnam ze tar lang thei thil hrang hrang hmanga chei mawi tum a ni bawk. (DIPR)