Lunglei khawpui tihhmasawnna leh cheimawina atana hmin sa Rs Nuai 5,387 hu

20 June 2026: Vawiin khan Mizoram sawrkara Urban Development & Poverty Alleviation (UD&PA) Minister Pu K.Sapdanga chuan Lunglei Circuit House Conference Hall-ah Lungleia thuthar thehdarhtu, Mizoram Journalists’ Association (MJA), Lunglei District member-te kawmin, thingpui a inpui.

Minister hi Adviser to Chief Minister (Political) Pu Lalmuanpuia Punte, MLA bakah, UD&PA Commissioner & Secretary Pu K. Lalthawmmawia leh Director Pu Jacob Lalawmpuia te’n an ṭawiawm a. MJA Lunglei District hi an President Pu H.Lalthansanga’n hovin, Lunglei khawpui hmasawnna tur hmalakna leh hmachhawp hrang hrang an sawi ho.

Minister Pu K.Sapdanga chuan Lunglei khawpui tana UD&PA-in a ruahman hmasawnna project lian zual tarlangin, State Priority Project (SPP) hnuaiah Rs Nuai 1,750 hu project lian 5 kalpui mek a awm thu a sawi a.

Rs Nuai 400 senga Sazaikawna LMC Complex dinna turah ram lei tura biak fel tawh a man pe hlei thei lova kum hnih a awm hnuah tunah ram leina tur sum funa an thawh phei thu leh vawiinah inhlan a nih tur thu sawiin, ram man an pe tlak thei ta chu lawmawm an tih thu a sawi a. LMC Complex sa tur hian contractor thlan fel a nih tawh thu leh hna an ṭan nghal theih dawn thu a sawi.

Minister chuan SPP hnuaiah hian Rs Nuai 350 senga lirthei lian leh te din khawmna tur Transport Hub sakna turin Theiriatah mimal ram lei anih thu leh a man pek tlakna tur tunah an rawn fun phei thu sawiin, contractor thlan fel tawh anih thu leh a rem veleh an bun ṭan theih dawn thu a sawi a.

Rs Nuai 200 senga Ramthar AOC Market Shed sakna tur pawh buaipui mek anih thu sawiin, Rs Nuai 300 senga C.Ṭhuamluaia Mual bula lirthei dahna Multi-Level Car Parking sak hna chu contractor-te’n an thawh mawp mawp tawh thu leh a hmun an laih zawh lek lek tawh thu a sawi.

Saikuti Hall chei ṭhatna turin Rs Nuai 500 dah anih thu leh dawhsan (stage), ṭhutna, lighting & sound, a chung leh thil hrang hrang thlak ngai thlak leh siamṭhat tur anih thu sawiin, a rang thei ang bera hna ṭan tum anih thu a sawi.

Minister chuan Urban Infrastructure Development Fund (UIDF 2025–2026) hnuaiah Lunglei khawpui tan Rs Nuai 525 dah anih thu sawiin, Lunglei Park chei ṭhat nan Rs Nuai 200 dah anih thu leh khaw ṭhat veleh contractor-te’n hna an ṭan nghal tur thu a sawi a. Khawlaia vantlang inthiarna in (pay and use toilet) set 1 Rs Nuai 25 zelin hmun 4-ah Rs Nuai 100 senga siam tura ruahman a nih thu leh bul ṭan theih thuai beisei a nih thu sawiin, a enkawl nan inthiar man erawh a awm a ngai dawn tih a sawi.

Khawpui chhunga kea kalte veivahna footpath chei ṭhat nan Rs Nuai 225 dah a nih thu leh khuain a zir chuan thawh ṭan theih thuai beisei anih thu a sawi.

Minister chuan SASCI Part-XB hnuaiah Lunglei khawpui chhung hmasawnna hna hrang hrang 80 thawhna tur Rs Nuai 200 dah anih thu sawiin, Municipal te enkawl chhunzawm tur anih thu a sawi a. Councillor-te’n an ward ṭheuhva thawh dan tur an siam fel tawh thu leh hna ṭan theih thuai beisei anih thu a sawi.

Minister chuan SASCI Part-V aṭangin damdawi in bawlhhlawh, mipui tana hmuh hrehawm leh him lote tihralna tur leh damdawi in chhung hmanrua tihral leh sawngbawlna turin Theriatah Common Bio-Medical Waste Treatment Facility din tum anih thu sawiin, ram neih fel a nih tawh thu leh a sak nan hian Rs Nuai 1,400 ruahman anih thu a sawi a. Chhim District pali dawl zo tura ruahmanna siam a nih thu leh tender tura lehkha pawimawh buatsaih mek a nih thu a sawi.

Minister chuan SASCI Part-XIII hnuaiah kawr lian hlauhawm siam thei leh a muala tawlh ṭhin tihdamna leh venna tur storm drain siam nan Lungleiah Rs Nuai 250 dah a nih thu a sawi a.

UD&PA aṭanga Lunglei khawpui tihhmasawnna leh chei mawina atana hmin sa hnathawh mai tur tun ṭuma an rawn feh chhuahpui chu a zavaiin Rs Nuai 5,387 hu anih thu a sawi.

UD&PA Minister Pu K. Sapdanga chuan Lunglei khawpui tana UD&PA project zawng zawng chu rulh leh ngai chi a awm vak lo tih sawiin, project tam zawk chu sum hnar awm tur a nih zawk thu a sawi a. Lunglei khawpui enkawlna atana sum tuakna tur project deuh vek a nih avangin a phurawmin a lawmawm tak zet tiin, UD&PA leh LMC hotute an lawm ang bawkin Lunglei mipuite pawh an hlim ve hle a beisei thu a sawi.

He hunah hian MJA member-te’n sawrkar hmalakna hrang hrang hriat duh an neihte chu Minister hi zawtin, rawtna leh mamawh an neihte Minister hnenah hian an thlen bawk a. Minister chuan an zawhnate chhangin, an rawtna leh mamawhte chu chhinchhiah a, a ṭul anga an en zui tur thu a sawi.