Operation Jericho kalpui hnuah ruihhlo tawlhruk a tlem; Ganja a hluar

21 July 2026: Vawiin khan Chief Minister Pu Lalduhoma kaihhruaiin Mizoram State Core Committee on Ruihhlo Do te chu CM Conference Hall-ah an thukhawm a, an hmalakna hrang hrangte an thlirlet.

Meeting-ah hian Pu K. Sapdanga, Home Minister leh Pu Lalnghinglova Hmar, Excise Minister bakah member te an kal tha hle.

Chief Minister chuan ruihhlo dona kawnga hmalatu department leh tlawmngaipawlte chungah lawmthu a sawi a, tunah hian ruihhlote hi do rem vek lo mahila, kan hmalakna hi a sawt hle tih a hmuh theih a ni, a ti.

Excise & Narcotics, Police Department, Social Welfare leh Central YMA atangin an hmalakna report ngaihthlak a ni.

Excise & Narcotics hmuh danin Operation Jericho kalpui hnuah nasa takin ruihhlo tawlhruk a tlem a, a man pawh a to chho a ni.

Police Department chuan kum 2025 khan ruihhlo case 319 an ziaklut a, mi 483 an man a, kuminah June thla thleng khan case 219 an ziaklut tawh a, a kaihhnawih mi 312 an man tawh a, case ziahluh leh mihring man zat a pun chhan hi kum hmasa lamah khan ruihhlo hi a hlawm lian deuhin an tawlhru thin a, kumin atang hian tlem tham te tein mi tam zawkin an tawlhru nia hriat a ni.

Social Welfare report atanga a lan danin Hulhhliap Short Stay Centre kalpui tawh zawng zawngte endikna (follow-up) atangin he centre-a lut za zela sawm thum (30%) ten ruihhlo hi an sim hlen a, he centre-a kal mi 198 te chu Skill Training chi hrang hrang chi 13 pek an ni a, an zinga mi 21 te chu Bana Kaih CM Special Package pek an ni. Hulhhliapah hian sorkar chuan mi pakhat enkawl nan Rs. 15,422 seng zel anga chhut a ni.

Vawiina meeting-ah hian Heroin a lo tlem a, a man a lo to tak hnu hian Ganja a lo hluar ta hle tih tarlan a ni a. Ganja hi hmeichhe naupangte pawhin an zuk thu sawi a ni. Chutiang bawkin Khuh damdawi pawh hi a hluar chho mek bawk a. Naupangte hnena ti lo tura zirtirna hi Mission mumal tak anga School Education leh kohhran hrang hrangte hmanga kalpui a tul hle nia ngaih a ni. Tin, heng thilte dan hmanga khuahkhirhna Mizoram state mil tur duangtu tur an din nghal a ni.