Pi Lawmi Parotid Tumor hlawhtling takin paih sak

Ramchhunga Cancer enkawlna hmun tha ber pawl Manipal Hospital EM Bypass, Kolkata chuan Mizo hmeichhia Parotid Tumor nei chu hlawhtling takin a zai.

Manipal Hospitals Network unit pakhat, Manipal Hospital EM Bypass, Kolkata chuan Aijal Club-a chanchinbumite an kawmnaah hlawhtling takin tunhnaiah Pi Lallawmzuali, kum 55 mi natna an zai thu an sawi a, Pi Lawmi hian Parotid Tumor neiin hei hi hlawhtling takin Manipal Damdawiinah paih sak a ni a, dam takin an chhauh a ni.

Manipal damdawiina thawk Dr. Kinshuk Chatterjee leh Dr Harsh Dhar chuan Pi Lallawmzuali chu hun rei tak chhung he natna tuar tawh anih avangin zai tura ruahman kawngah Doctor hrang hrang an inrawn nasa hle an ti a, zai tu mai bakah radiologist, anesthesist leh thiamna nei hrang hrang inrawnin hlawhtling takin an zai a, Pi Lawmi sawi danin a natna avangin a beng leh a nghawng bawrah harsatna lian tak tawkin a nat thin thu a sawi a, a vung nasa chuan a taksaah harsatna a thlen tih sawiin hlawhtling taka enkawl ani chu a lawm takzet tih a sawi a ni.

Manipal Hospital EM Bypass, Kolkata hian ramchhunga damlo natna khirh tak tak lo enkawl tawh thinin heng zingah hian Mizo tam tak enkawl dam an awm tawh a, Cancer natna enkawl kawngah an hmingthan em avangin pantu pawh an thahnem hle a ni.

Manipal Hospitals hian kum tin damlo maktaduai 7 chuang enkawlin khawpui 19-ah a inzar pharh a ni. (AIR)