Tanpuina leh chhawmdawlna ruahmansak turin ngen

15 July 2026: Lunglei District Bawrhsap & District Disaster Management Authority (DDMA) Chairperson Pi Navneet Mann chuan vawiin khan Mizorama NHIDCL Executive Director hnenah lehkha thawnin, Lunglei District-a National Highway-54 & 302-a lei min leh kawngpui pingin a nghawngte hnena ṭanpuina ruahman tur leh kawngpui ṭha a awm theih nana chak zawka hma la turin a ngen.

Lunglei Bawrhsap chuan NHIDCL Executive Director hnena lehkha a thawnah hian, Lunglei District chhungah National Highway 54 leh 302 kawngah, a bikin Theiriat, Bualte, Ṭawipui South leh hmun ṭhenkhatah lei min leh lei tawlh nasa tak avangin buaina tam tak a thleng tawh tih tarlangin, chhiatna nasa zawk pumpelh a nih theih nan hmun pawimawh zuala kawng laih leh siam hna chu a hun taka zawh tum turin DC Office chuan PMU leh contractor hnenah vawi tam tak ngenna leh hriattirna an thawn tawh chungin tun thlengin hmasawnna duh khawp hmuh tur a awm lo tih a sawi.

Tun ṭumah pawh kum dang ang bawkin Theiriat, Bualte leh Ṭawipui South hmunah lei min nasa tak thleng lehin, khualzin tangkhang mi 2,242 vel an awm bakah, bungraw pawimawh, damdawi leh emergency service chet velna pawh a tikhaihlak nasa hle tih sawiin, rei tak kawng a pin avangin khawtlang mipuite’n an tuar nasain, Lunglei District chauh ni lovin Mizoram chhim lam pum puite eizawnna, sumdawnna leh nunphung pawh nasa takin a nghawng buai tih a sawi a. District Disaster Management Authority (DDMA) chuan YMA leh Local Council/Village Council te nen ṭang kawpin khawtual mi harsatna tawk leh khualzin tangkhangte ṭanpui leh chhawmdawl hna an thawk chungin, harsatna chu District-in sum leh hmanrua a neihte hmanga chhawk leh chin fel zawh rual a nih tawh lo tih a sawi.

Hetiang a nih avang hian NHIDCL chuan he’ng chhiatna tuartu chhungkua leh Village/Local Council te tan a theih anga ranga a bik taka ṭanpuina leh chhawmdawlna ruahmansak turin a ngen a. Lei min leh kawng pingin mipuite nunphung leh khawsak a nghawng buai dan chu sum hmanga teh theih a nih loh thu sawiin, hotu sang zawkte’n ṭul leh remchang an tih ang tawka ṭanpuina leh chhawmdawlna chu ruahman turin a ngen. (DIPR)