17 Feb 2025: Vawiin chawhma dar 10:00 khan MHIP General Headquarters huaihawtin, tun hnaia rawng taka Pi Rebecca Chanchinthangi, a pasal kut tuara a boral tak duh lohna lantir leh, pawikhawihtu chunga dan ang taka rorelna phutin Vanapa Hall, Aizawlah punkhawmna (peaceful demonstration) neih a ni. He hun hi Women & Child Development changtu Minister Pi Lalrinpuii chuan a thlawpzia lantirin a hmanpui.
Punkhawmnaah hian Women & Child Development changtu Minister Pi Lalrinpuii chuan thusawiin, Hmeichhiate chunga hleilenna rapthlak tak tak hriat tur awm ta fo mai chu zahthlak leh lungchhiatthlak hle a a hriat thu a sawi a. Mahni in lumah ngei pawh Hmeichhiate an him ta lo ni a langte, an kawppuite kut ngei tuara vanduaina an tawk ta fo maite chu hriatthiam har a tih thu tarlangin, danin a kawng a zawh ngei theih nan te, Hmeichhiate chunga hleilenna chu a thlen tawh lohna turte leh mipate pawh heng ang hleilenna lakah hian venpui tura sawmin, India ram danpui ngei pawhin mi zawng zawngte tana zalen leh zahawm taka nung tura dikna chanvo a pek dan te a sawifiah a. Hmeichhia tute pawhin hetiang lama harsatna an tawk anih chuan engtik lai pawhin Helpline Number 181 chu call theih a ni tih put darhpui theuh turin a sawm nghal a ni.
Vawiina punkhawmna hi Pi Lalliani, General Secretary, MHIP General Headquarters chuan kaihruaiin, Pi Ngurmawii Sailo, MHIP General Headquarters President chuan Hmeichhiate chunga hleilenna dodalna thu tawi a sawi a. Hemi zawh hian Pi Lalhmuchhuaki, Committee Member, MHIP General Headquarters kaihhruaiin kalkhawmte chuan au rualna hun an hmang a, punkhawmna hi tihtawp zui a ni.
