“Phalna pekte chauhvin lei verhin lei chhung tui an hmang thei dawn”  – PHE Minister

14 Aug 2024: PHE Minister Prof. Lalnilawma chuan vawiin khan a pisaah chanchinbumite a kawm a, Mizoram sawrkar thuchhuak angin Mizoram Ground Water Act, 2023 leh Rules 2024 dan hnuaiah Mizoram State Ground Water Authority (MGSA) din a nih thu a sawi.

Minister chuan he authority hian state puma lei chhung tui hausakna humhalh leh hman dan mumal takin kalpui a nih tur thu a sawi a. He dan hnuaiah hian tui lakchhuah phalna dan, registration leh licensing pek dan, khap leh humhalh dan leh dan zawm lote hremna a awm a ni a ti.

PHE Minister chuan lei chhung tui la chhuaka hman tum reng reng te chuan Mizoram State Ground Water Authority hnenah form awm sa hmanga dilna thehluhin, phalna pekte chauhvin lei verhin lei chhung tui an hmang thei dawn tih a sawi a. Lei chhung tui la chhuaka hmang mek leh leiverhna khawl nei reng reng te chuan MSGA-ah dilna form awmsa thehlutin inziah luh tur a ni a ti.

Prof. Lalnilawma chuan lei chhung tui tam tawklohna hmun atanga tui lak chhuah khap a nih thu a sawi a. He dan bawhchhia, phalna nei lova hma la lui emaw, khawl register loh hmanga leiverhte chu hremna pek an nih tur thu a sawi a ni. (AIR)