29 November 2023: Rs 8,00,000 sênga sak Public Health Engineering (PHE) Department Site Office, Theiriat, Lunglei ami chu vawiin chawhnu khan PHE Department Chief Engineer (Zone-II) Er Anup Chhetry chuan a hawng.
Hawnna inkhawm Site Office building-a neih hi PHE Dept-a Lunglei Water Supply Maintenance (LWSM)-a Executive Engineer (EE) Er Lalropuia Hmar-in a kaihruai a. PHE Dept C.E chuan hun remchang neia an department hmalakna pakhat Site Office thar a hawn sak theih avang leh he huna tel zawng zawngte hnenah lawmthu sawiin; sum remchang ang ang dapchawpa Site Office hawn tak chu Departmental Work-a sak a nih thu a sawi.
Site Office hawngtu Chief Engineer Er Anup Chhetry chuan PHE Dept Lunglei-a thawktute remhriatna avanga Site Office thar leh Bill pekna Revenue Office ni nghal bawk hawn theih a ni chu lawmawm a tih thu sawiin; Lunglei-a PHE Dept Site Office engemawzat zingah mimal In luah pakhat chauh a ni ta chu hmasawnna pawimawh tak a ni, a ti. Er Anup chuan Site Office-te chu thawktute’n mahni ta ang tak taka en tura fuihin, Theiriat mipuite pawhin Site Office thar hawn tak chu tangkai taka an hman ngei a beisei thu a sawi. Hetih lai hian Site Office chu tangkai hle mahse khawvel hmasawnna kal zelah dik zawk leh fel zawk, awlsam zawka bill pek theihna internet hmanga bill pek chu uar zel turin mipuite zirtir nasat a tul tih C.E chuan sawiin; mi zawng zawngin internet hmanga bill an pek theih nan hmalakna kalpui tum mek a ni, a ti. Site Office hawngtu PHE CE (Zone-II) Er Anup Chhetry chuan PHE Dept-a thawktute chu mipui rawngbawltu an nihna hre reng chunga dawhtheihna leh taihmakna nen hnathawk tura inpe thar leh turin a ngen bawk a ni.
He huna thusawitu dang PHE Dept-a Lunglei Circle-a Superintendent Engineer (SE) Er K.Zohmingliana pawhin an department hotu hmasate hmalakna kal zel avanga PHE Dept Lunglei-in hma a sawn zel leh Section 14 laia Site Office a awm thei chu lawmawm a tih thu a sawi a. An C.E-in a hawn tak Site Office thar chu Site Office zingah a tha ber pawl nia a hriat thu a sawi.
Site Office hawnna veng Theiriat VCP Pu Ramdingliana pawhin, an khawtlangah PHE Dept-te’n Site Office thar an hawng chu lawmawm a tih thu sawiin; khawtlang hmasawnna thar pawimawh tak a ni, a ti a. Hetiang a thlen theihna tura thawktu zawng zawngte chungah khawtlang aiawhin lawmthu a sawi a ni. PHE Dept Lunglei-a Rural Water Distribution-a Executive Engineer (EE) Er Laltlanchhunga pawhin LWSM thawktute thawhkhawm leh sum remchang dapchawpa Site Office tha tak hawn a ni chu thawktute fakawm a tih thu a sawi bawk.
PHE Dept C.E Er Anup Chhetry hawn tak PHE Site Office, Section 12-naah hian Site Office bakah Tui Bill pekna leh Pump House te a awm tel nghal a ni.
Site Office hawnna inkhawmah hian PHE Dept Lunglei-a SDO Er Lalduhawma Chhakchhuak-in Technical Report a peka a lan danin, he Site Office thar hi Assam-type building, a dung feet 40 leh a vàng feet 18; Zopa chiara chhawng hnih niin, Rs 8,00,000 sênga sak a ni.
