PHE Minister-in Central YMA hruaitute tuihna humhalh leh faina kawnga thawhhona chungchang a sawipui
14 Aug 2024: Vawiin chawhnu dar 1:30 khan PHE Minister Prof. Lalnilawma chuan a Pisa, MINECO ah Central Young Mizo Association (CYMA) hruaitute lengah sawmin tuihna humhalh leh faina kawnga thawhhona chungchang a sawipui.
PHE Minister Prof. Lalnilawma chuan tuihna humhalh leh faina kawngah Central YMA leh PHE Department-in thawhdunna tha tak an lo neih tawh chu chhawmnun zel a tul thu a sawi a. Central YMA President Pu Lalhmachhuana pawhin tuihna humhalh leh faina kawngah YMA chuan sawrkar tha taka a thawhpui zel dawn thu a sawi bawk.
He hunah hian tuihna humhalh leh faina kawnga hmalak tlan dante thlirho niin, tuilakna lui leh a kama awm tuihna siamtu thing leh maute an chereu mai loh nana humhalh tura tanlak lehzual a tul thu leh hmalak dan turte sawiho a ni a. Luidung tibawlhhlawhtu hnawmhnawk thianfaia faina kawnga hmalak a tul thu pawh sawiho niin, Mizoram pumah faina hnatlangpui buatsaih ni se an ti. Sawrkar scheme pawimawh tak Jal Jeevan Mission (JJM) leh a dangte kaltlangin tuilakna leh in tin thleng pha tui pekna siam ni mah se, tui herhhaw mai tur a awm leh si loh chuan hmasawnna ruhrel siamte’n awmzia a neih dawn loh avangin, tuihna humhalh leh a siam theitu tihpun kawngah ngaihtuahna sen tlan a tul thu tarlan a ni.
PHE Department leh Central YMA te hian kum 2012 atang khan ‘Kan rama tuihna humhalh leh a awmsa tihpun’ tih thiltuma neiin thawhdunna thuthlung an ziak a, tuna thawhdunna kalpui mek hi October ni 28, 2021 khan ziah niin kum 4 chhung, 2021-2025 thleng a awh dawn a, a zawh hnuah a tul anga ennawn leh tura tih a ni.
