Pi V.Lalhmangaihi’n Nurse chawimawina sang ber Florence Nightingale Award a dawng
Pi V.Lalhmangaihi’n Nurse chawimawina sang ber Florence Nightingale Award a dawng
30 May 2025: Civil Hospital Aizawl-a Nursing Officer Pi V.Lalhmangaihi chuan vawiin khan President Droupadi Murmu hnen atangin India rama Nurse chawimawina sang ber Florence Nightingale Award a dawng.
Vawiina he chawimawina hlanna inkhawm, Rashtrapati Bhavan, New Delhi-a neihah hian India ram state hrang hrang atangin Nurse hnathawk tha leh chawimawi tlak mi engemawzatte hnenah chawimawina hi hlan a ni.
Pi V.Lalhmangaihi hi Aizawl Venghnuaiah a cheng mek a, a duty-na hmun leh hmun dangah theih tawp chhuahin dam lote nunna vawi tam tak a lo chhan tawh a, Mizoram sorkar hnuai a ICU hmasa ber Civil hospital Aizawlah din a nih khan, sulsutu leh tha leh zung sengtu niin ICU lama a thiamna a chhuanawm em em a, a manual siamtu zingah telin mi tlawmngai leh taima tak, mamawhtute tana englai pawha che chhuak thei zel mi a ni.
National Florence Nightingale Award hi Ministry of Health and Family Welfare, Government of India chuan kum 1973 khan nurse leh nursing professional-te’n khawtlang tana an rawngbawlna tha tak takte hriat rengna atan a din a ni. Mizoram chhunga thawk nurse mi 16 in he chawimawina hi an dawng tawh. Kumin a dawngtu Pi V Lalhmangaihi hi 17-na a ni a, Mizo nurse, state pawna thawk pahnihin an dawng tawh bawk. He chawimawinaah hian pawisa fai Rs 50,000 leh medal pek thin an ni.
Mizoram sorkar chuan kumin atangin dan mumal tak siamin lawmpuina citation leh pawisa fai Rs 50,000 a hlan bawk ang. (AIR)
