03 Jan 2024: Lunglei khawpui tui a chawmtu Pialthleng leh Tlawng Lui infinna chu tui tam zawk khuahtlin anih theih nan kumin November thla tir atanga vawiin thleng khan ngawrh taka hmalak a ni.
PHE Department Lunglei hotute chuan Lunglei khawpuiah tui indaihlohna a nasa tawh hle tih sawiin, tuna Lunglei khawpui chawmtu ber Greater Lunglei Water Supply Scheme chu kum 1995 a hawn daih tawh niin tun dinhmunah tui indaihlohna a nasa hle a, tluang taka darkar 24 tui pump anih pawhin mipuite duhkhawp ang tui a awm thei tawh lo tih an sawi.
Hetiang anih avang hian Lunglei khawpui chawmtu ber Pialthleng lui leh Tlawng lui infinna hmuna tui an pump-na chu ruahtui tam laia tui pump tur tam zawk khuahtlin anih theih nan JJM (AMRUT) hnuai atangin hmalakna kalpui mek anih thu an sawi a, hei hi a hlawhtlin hunah chuan thal khawro hunah pawh tui pump tur tam zawk a awm thei dawn a ni an ti.
Hetianga an hmalak mekna chungchangah hian Er. Lalropuia Hmar. E.E, Lunglei Water Supply Maintenance Division chuan, tum anga tuikhuah hna hi thawh theih anih chuan tui litre Maktaduai 200 chuang khuah theih an inbeisei tih sawiin; lui tui ringawt ring lo va tui tam tak khuah tlin anih chuan thal khawro hunah pawh tui lama harsatna chu a ziaawm ngei an beisei tih a sawi.
Tuikhuah hna thawk tur hian Luiah Hitachi emaw Excavator emaw a luh theih a ngai a, chumi tur chuan tunah hian department lam chuan Site Preparation hna an thawh mek thu sawi bawkin, a khuah hna tak tak hi Rs Nuai 467 bawr vela thawh tur niin; sawrkarin Tender te pawh la chhuah tura ngaih anih thu leh Kolkatta lam atangin mithiamte’n a leilung dinhmunte an la enfiah hmasak dawn thu a sawi a ni.
