PM-in Bairabi – Sairang rel kawng thar hawngin Mizorama rel service thar pathum a vailiam

13 Sept 2025: Vawiin khan Prime Minister Pu Narendra Modi chuan lehlangin Mizoram a rawn tlawh a, Rs. Vbch 8071 senga siam Bairabi – Sairang rel kawng thar, km 51.38 a thui a hawng a, Mizorama rel service thar pathum: Aizawl – Delhi Rajdhani Express (Anand Vihar Terminal), Aizawl – Kolkata Express leh Aizawl – Guwahati Express te a vailiam bawk.

Heng bakah hian Rs. Vbch 33 senga sak Residential School, Kawrthah (Ministry of Minority Affairs) leh Rs. Vbch 24 senga sak Tlangnuam Eklavya Model Residential School (Ministry of Tribal Affairs) chu a hawng bawk a. Rs. Vbch 500 senna tur Aizawl Western Side Bypass Road (MDoNER), Rs. Vbch 226 senga thawh tur Mualkhanga 30 Tounsand Metric Tons Per Annum Gas Bottling Plant (MoP&NG), Rs. Vbch 70 senga thawh tur Chhimtuipui (Tuipui Ferry) lei (Bridge) (MoRTH), Rs. Vbch 45 senga thawh tur Thenzawl – Sialsuk kawngpui (via Sathlur & Lau river) (MDoNER), Rs. Vbch 32 senga laih tur Khankawn to Rongura Hmun kawngpui, Serchhip district (MDoNER) leh Rs. Vbch 12 senga thawh tur Khelo Multipurpose Hall, Tuikual, Aizawl (Ministry of Youth Affairs & Sports) te lungphum a phum bawk.

Prime Minister chuan, Lalnu Ropuiliani leh pasaltha Khuangchera ten ram hmangaih tura min zirtirnate kha rilruah a awm reng thin, a ti a. India ramin hmasawnna kawng a zawhnaah Mizoramin hmun pawimawh tak a chang tih a lo lang, a ti. Sairang – Delhi rel kawng thar hi inkalpawhna a ni satliah lo va, kawng tinrenga hmasawnna thar lo thleng tur tana a kulpui a ni. Sumdawng te, loneitu te, zirlaiten an chhawr hle dawn a, hriselna lamah pawh kan tangkaipui hle ang, tiin Sector hrang hrangin hma a sawnpui dawn a ni, a ti.

PM chuan, kan sorkar hnuah hmarchhak bial tan hmasawnna hna kan thawk hnem tawh hle a, kan la thawk zel dawn, a ti a. NE India leh SE Asia hi Mizoram kaltlanga thlunzawm kan tum a, Act East Policy hnuaia Kaladan Multi Modal Transit Transport Project leh Sairang to Hmawngbuchhuah rel kawng hmangin NE Economic Corridor, Bay of Bengal kaltlangin Asia chhimchhak ram te kan thlunzawm dawn a ni, a ti bawk.

Prime Minister hi zing lamah Lengpuiah a rawn tum a, Lengpuiah hian Pu K.Sapdanga, Home Minister leh official-te’n an lo hmuak a. Lengpui atangin Helicopter-in Thuampuiah a rawn tum leh tura tih ni mahse khaw chhia vangin thulh a ni a, Lengpui Airport atangin Video Conference hmangin thu a sawi ta zawk a. A lawmnapui ber Lammualah chuan Mizoram Governor Gen. (Rtd) VK Singh,  Chief Minister Pu Lalduhoma, Pu Ashwini Vaishnaw, Railways Minister leh mipui tam tham takin hun an hmang a ni. (DIPR)