Police-te’n Nuai 8 chuang man hu Heroin leh Nuai 9 chuang man hu Zu an man tawh
21 Feb 2024: Lunglei Police Addl. S.P, Pu Beihmotaosa MPS, chuan vawiin chhun khan a Office Chamber-ah thuthar thehdarhtute kawmin kum 2024 chhunga Lunglei Police-te’n ruihhlo an man tawh dan a tarlang. Addl SP hi Pu Zarzokima MPS, SDPO/PRO-in a tawiawm a ni.
Lunglei Police-te hian nizan khan an thu dawn bawhzuiin Haulawng leh Lunglei inkar Mausen khaw daiah dan lova Zu phurh thahnem tak leh he thil kaihhnawihah mi 2 leh lirthei 1 an man tih an sawi a. Heng an zu man te hi Royal green case 1 (bottle 12), MC Dowels Whisky Case 4 (bottle 48), MC Dowels XXX Rum Case 5 (bottle 60) leh King Fisher Beer Can 24 te niin, Lunglei tualchhung hralhna ang chuan Rs.1,56,000/- man hu a ni. Zu neitu nia puh Nasim Uddin Laskar (26) S/o Fakar Uddin Laskar, Joydhanpur Cachar District leh Dilwar Hussain Laskar (30) S/o Jalal Uddin Laskar, Bagha leh an Motor Mahindra Pik-Up, AS11EC/4575 chu man an ni bawk a, heng Zu an man te hi Chawhhmeh an phurh hnuaiah an dah tih Addl.S.P chuan a sawi.
Kumin 2024 chhung hian Lunglei Police-te chuan Heroin Gram 285.71, tualchhung hralhna rate-ah Rs.8,56,900 man hu an man tawh a, hemi kaihnawihah hian thubuai ziahluh anih bakah mihring 4 an man a ni. Heng bakah hian Sap Zu Um puitling 504 (litre 389.96) tualchhung rate a Rs.6,16,800/- man hu leh Rakzu litre 619, Rs.309,500/- man hu man bawkin, a vaia Zu man hlut zawng hi Rs.9,26,300/- man hu niin, MLP Act thubuai 11 an ziaklut tawh tih Addl. S.P Pu Beihmotaosa chuan a sawi.
Ruihhlo dona kawngah Lunglei Police-te’n theihtawp an chhuah thu leh hemi kawngah hian mipuite leh Chanchinbumite thawhpuinah ngenin, ruihhlo tam zawk phai atang leh khawchhak lam atanga lo lutte hi sumdawnna phen atanga lakluh anih bakah, sawrkar Holiday leh Pathianni-ah te khawpui chhung luhpui a ni zual bik tih Addl.S.P chuan a sawi a ni.
