“Politics hi Pathian rawngbawlna anih avangin mipui duhdana khelh tur a ni” – LDCC President

10 Nov 2025: Vawiin chawhma dar 11:00 khan Lunglei District Congress Committee chuan LDCC Bhawan-ah Chhung inkhawm leh Political Session hun an hmanga, Pu Lalbeiseia Pachuau, Serkawn Congress Unit President-in a kaihruaia Pi R.Lalhmangaihzuali, LDCC General Secretary-in Pathian hnena inhlanna hun a hmang.

Political Session huna thusawitu LDCC President Pu R.Lalnunthara chuan, Politics hi Pathian rawngbawlna anih avangin ram leh mipui duhdana khelh tur a ni a ti. Mizoramin U.T kan nih atanga kan Chief Minister neih tawh zawng zawngte hnathawh han thlir kir ila hna tha tak tak an thawk a, chumi zingah chuan kan ram leh hnam tana hmasawnna hna thawk tam ber chu Congress Chief Minister Dr.Lal Thanhawla a ni tih hi thangtharte pawh hian kan hriat angai a ni, a ti a. Congress chuan kan ti ang a tih chu a ti thin a, kan ti lovang kan tih chu kan ti lo mai a, sawi anga awm thin Party a ni, a ti.

Lok Sabha inthlan hnuhnung ber kan ngaihtuah let chuan Zoram mipui min velin min ti tap a ni Pu Mathara chuan ti bawkin, kha MP inthlana Candidate te khan CAA kan dodal ang an ti a mahse thlantlin an nih hnuah chuan an dodal leh lo va, FCAA nasa taka dodaltuin an thutna hmun an sawn tak avanga a duh leh tlat si te hi Zoram mipuite engmah lova min ngaihna chiang tak a ni a ti. North East State ah BJP leh a thawhpuite Sawrkar lohna chu Mizoram chauh a ni tawh a, vawiinah hian sum leh pai leh hmasawnna hmangin min lei an tum mek a kan inngaihtuah ngun a ngai hle a, India ram hmun hrang hranga BJP sawrkarnaah chuan chanchin tha hrilh pawh a harsa tawh hle a ni a ti.

Lunglei mipuite pawhin inthlanpui kan hmachhawn leh turah mahni thusawi anga ti thin, Lunglei tana ding ngam MLA thlang tura tun atanga kan inbuatsaih angai tawh a ni LDCC President chuan a ti.

Mizoram State University chu Lunglei leh chhim lam hmasawnna atan kan tu leh fate lo awm zel tur atan ti a tlumtea thlira kan lo thlir chu Aizawlah bawk dah tum a ni leh hi rilru a na em em a, Lungleia State University a awm theih nan hma la mektute chu Lunglei District Congress Committee chuan a thlawp tlat a ni Pu R.Lalnunthara chuan tiin, ZPM sawrkar kan hrawn mek chu kum thum an la neih mekah hian Zoram mipuite thatna tur leh hmasawnna tak tak ngaihtuaha rorelna kalpui turin a ngen bawk a ni.